سرینگر،: محکمہ موسمیات کے مرکز سرینگر نے جمعرات کو جاری کردہ اعداد و شمار میں بتایا کہ یکم جون سے 9 جولائی تک کشمیر صوبے میں موسمی بارش میں 21.63 فیصد کمی ریکارڈ کی گئی، جبکہ جموں صوبے میں اسی مدت کے دوران مجموعی طور پر 8.07 فیصد زائد بارش درج کی گئی۔
محکمہ موسمیات کی جانب سے جاری کردہ رپورٹ کے مطابق کشمیر صوبے میں معمول کے 69.34 ملی میٹر کے مقابلے میں صرف 54.34 ملی میٹر بارش ریکارڈ کی گئی، جس کے نتیجے میں 21.63 فیصد کمی سامنے آئی۔
کشمیر کے اضلاع میں گاندربل میں سب سے زیادہ 25 فیصد زائد موسمی بارش ریکارڈ کی گئی، اس کے بعد پلوامہ (21 فیصد) اور بارہمولہ (19 فیصد) کا نمبر رہا۔ دوسری جانب شوپیاں میں سب سے زیادہ 77 فیصد کمی ریکارڈ کی گئی، جبکہ کولگام (55 فیصد)، بڈگام (45 فیصد)، بانڈی پورہ (43 فیصد)، سرینگر (41 فیصد)، کپواڑہ (23 فیصد) اور اننت ناگ (9 فیصد) میں بھی معمول سے کم بارش ہوئی۔
ادھر جموں صوبے میں معمول کے 152.62 ملی میٹر کے مقابلے میں 164.95 ملی میٹر بارش ریکارڈ کی گئی، جو مجموعی طور پر 8.07 فیصد زائد ہے۔
جموں خطے کے اضلاع میں سانبہ میں سب سے زیادہ 81 فیصد زائد بارش ریکارڈ کی گئی، اس کے بعد ادھم پور (74 فیصد)، پونچھ (28 فیصد)، جموں (4 فیصد)، ڈوڈہ (4 فیصد) اور رام بن (3 فیصد) شامل ہیں۔ جبکہ کٹھوعہ (17 فیصد کمی)، ریاسی (22 فیصد)، کشتواڑ (31 فیصد) اور راجوری (38 فیصد) میں موسمی بارش معمول سے کم رہی۔
3 جولائی سے 9 جولائی تک کے ہفتہ وار اعداد و شمار کے مطابق بھی دونوں ڈویژنوں میں متضاد رجحان دیکھنے میں آیا۔ کشمیر ڈویژن میں اس عرصے کے دوران 65.54 فیصد کمی ریکارڈ کی گئی، جبکہ جموں ڈویژن میں 28.34 فیصد زائد بارش درج ہوئی۔
تازہ بارش کے یہ اعداد و شمار ایسے وقت میں سامنے آئے ہیں جب حالیہ دنوں میں جموں خطے کے کئی اضلاع میں شدید بارشوں کے باعث اچانک سیلاب، لینڈ سلائیڈنگ اور بادل پھٹنے کے واقعات پیش آئے، جبکہ جاری مانسون سیزن کے دوران کشمیر کے بیشتر علاقوں میں اب بھی معمول سے کم بارش ریکارڈ کی جا رہی ہے۔ (کے این ٹی)
