فردوس وانی
سری نگر، : ڈائریکٹر جنرل آف پولیس (ڈی جی پی) جموں و کشمیر، نالین پربھات نے جمعرات کو کہا کہ پولیس پاکستان کی سرپرستی میں ہونے والی دہشت گردی اور نارکو ٹیررازم کے خلاف فیصلہ کن جنگ لڑ رہی ہے، اور سرحد پار منشیات کے نیٹ ورکس اور ان کے سرپرستوں کے خلاف سخت کارروائی کی وارننگ دی ہے۔
پی سی آر کشمیر میں ایک پریس کانفرنس سے خطاب کرتے ہوئے ڈی جی پی نے کہا کہ ’’نشہ مُکت ابھیان‘‘ کے تحت جموں و کشمیر بھر میں منشیات مخالف کارروائیوں میں نمایاں شدت آئی ہے۔
انہوں نے کہا کہ 2023 سے اب تک منشیات کے خلاف جنگ میں پولیس نے ’’مسلسل بہتر کارکردگی‘‘ کا مظاہرہ کیا ہے، خاص طور پر جائیدادوں کی ضبطی، احتیاطی نظربندیوں اور منشیات کی برآمدگی کے معاملات میں۔
انہوں نے کہا، ’’2023 سے 2026 تک منشیات کی اسمگلنگ سے جڑی جائیدادوں کی ضبطی میں مسلسل اضافہ ہوا ہے۔ اس حوالے سے 2025 میں جموں و کشمیر پولیس کو قومی سطح پر تیسرا مقام حاصل ہوا۔‘‘
ڈی جی پی نے مزید کہا کہ 2025 میں PIT-NDPS کے تحت 240 احتیاطی نظربندیاں عمل میں لائی گئیں، جس کے باعث جموں و کشمیر پولیس ملک بھر میں پہلے نمبر پر رہی۔ انہوں نے کہا، ’’خصوصی طور پر نشہ مُکت ابھیان کے تحت گزشتہ برس کے مقابلے میں NDPS مقدمات میں تقریباً سات گنا اضافہ درج کیا گیا۔‘‘
انہوں نے کہا کہ جموں و کشمیر بھر میں درج 724 این ڈی پی ایس مقدمات میں ملوث 806 افراد کو گرفتار کیا گیا۔ ’’اہم گرفتاریوں میں گلزار احمد عرف لو گجر شامل ہے، جو 28 مقدمات میں مطلوب تھا، جبکہ جموں صوبے میں اونیت سنگھ عرف ناگی 17 مقدمات میں مطلوب تھا،‘‘ انہوں نے کہا۔
ڈی جی پی کے مطابق مہم کے دوران 667 کلوگرام منشیات اور 90 ہزار سے زائد نفسیاتی ادویات کی یونٹس ضبط کی گئیں۔ ’’24 عادی منشیات فروشوں کے خلاف احتیاطی کارروائی بھی کی گئی۔‘‘
انہوں نے مزید کہا کہ اب تک منشیات کی اسمگلنگ سے منسلک 41.85 کروڑ روپے مالیت کی 97 جائیدادوں کی نشاندہی کرکے انہیں ضبط کیا گیا ہے۔ ’’اننت ناگ پولیس نے ایک ہی مقدمے میں 6.17 کروڑ روپے مالیت کی جائیداد ضبط کی۔ پہلی بار جموں و کشمیر پولیس نے ریاست کی حدود سے باہر گورداسپور، پٹھانکوٹ اور چندی گڑھ میں بھی جائیدادیں ضبط کی ہیں،‘‘ انہوں نے کہا۔
انہوں نے مزید کہا کہ کولگام پولیس نے بھی منشیات کے مقدمات میں بیک ورڈ لنکیجز قائم کرنے کے لیے جموں کے بینی چرانہ علاقے میں 93 لاکھ روپے مالیت کی جائیداد ضبط کی۔
ڈی جی پی نے کہا کہ قانونی کارروائی مکمل کرنے کے بعد منشیات کی تجارت سے حاصل شدہ تقریباً 15 کروڑ روپے مالیت کی 41 جائیدادوں کو منہدم بھی کیا گیا۔ ’’مہم کے دوران 117 کنال اراضی پر غیر قانونی پوست اور بھنگ کی کاشت کو تباہ کیا گیا۔‘‘
انہوں نے کہا کہ فارماسیوٹیکل اداروں کا بھی خصوصی معائنہ کیا گیا۔ ’’کم از کم 5,238 کیمسٹ اور میڈیکل دکانوں کی جانچ کی گئی جبکہ 151 خلاف ورزی کرنے والے اداروں کے خلاف کارروائی شروع کی گئی۔ مہم کے دوران 4,962 کلوگرام منشیات اور 6,493 نفسیاتی ادویات کی یونٹس کو تلف کیا گیا۔‘‘
انہوں نے کہا کہ منشیات کے مقدمات میں ملوث 162 افراد کے ڈرائیونگ لائسنس منسوخ یا معطل کیے گئے، جبکہ منشیات کی اسمگلنگ میں استعمال ہونے والی 92 گاڑیوں کے رجسٹریشن سرٹیفکیٹس بھی منسوخ یا معطل کیے گئے۔
اس کے علاوہ منشیات سے متعلق سرگرمیوں میں ملوث 10 افراد کے پاسپورٹس ضبط کرنے کی سفارش بھی کی گئی ہے۔
