بیجنگ، 05 مئی: چینی سرکاری میڈیا کے مطابق چین کے وسطی صوبے ہونان میں ایک آتش بازی بنانے والی فیکٹری میں ہونے والے ہولناک دھماکے کے نتیجے میں کم از کم 26 افراد ہلاک جبکہ درجنوں زخمی ہو گئے ہیں۔
سرکاری میڈیا کے مطابق دھماکہ اچانک پیش آیا جس کے بعد فیکٹری میں آگ بھڑک اٹھی اور قریبی علاقوں میں خوف و ہراس پھیل گیا۔ امدادی ٹیمیں فوری طور پر موقع پر پہنچ گئیں اور زخمیوں کو قریبی اسپتالوں میں منتقل کیا گیا۔
حکام کا کہنا ہے کہ زخمیوں میں سے کئی کی حالت تشویشناک ہے، جس کے باعث ہلاکتوں میں اضافے کا خدشہ ظاہر کیا جا رہا ہے۔ ریسکیو آپریشن کئی گھنٹوں تک جاری رہا تاکہ ملبے تلے دبے افراد کو نکالا جا سکے۔
ابتدائی تحقیقات کے مطابق دھماکے کی وجہ تاحال معلوم نہیں ہو سکی، تاہم خدشہ ظاہر کیا جا رہا ہے کہ یہ واقعہ فیکٹری میں موجود آتش گیر مواد کے باعث پیش آیا۔
چینی حکام نے واقعے کی مکمل تحقیقات کا حکم دے دیا ہے اور ملک بھر میں آتش بازی بنانے والی فیکٹریوں میں حفاظتی اقدامات کا ازسرنو جائزہ لینے کی ہدایت کی گئی ہے۔
