سرینگر، 05 مئی: جموں و کشمیر میں "نشہ مکت جموں و کشمیر ابھیان” کے تحت جاری 100 روزہ مہم کے دوران منشیات کی اسمگلنگ کے خلاف اپنی مسلسل کارروائی کو جاری رکھتے ہوئے، سرینگر پولیس نے ایک بدنام زمانہ منشیات فروش کی تقریباً 1.20 کروڑ روپے مالیت کی غیر منقولہ جائیداد ضبط کر لی ہے۔
پولیس اسٹیشن نوہٹہ نے این ڈی پی ایس ایکٹ کی دفعہ 68-ایف کے تحت کارروائی کرتے ہوئے، ایف آئی آر نمبر 61/2019 (دفعات 8/20 این ڈی پی ایس ایکٹ) میں ملوث ملزم کی جائیداد کو ضبط کیا۔ ضبط شدہ جائیداد میں ایک مکمل طور پر تیار شدہ تین منزلہ رہائشی مکان، ایک علیحدہ سنگل اسٹوری کنکریٹ کچن بلاک جس میں تین واش رومز شامل ہیں، اور 9 مرلہ اراضی شامل ہے۔
یہ جائیداد نثار احمد شیخ ولد حبیب اللہ شیخ، ساکن کنہِ دیوار، شیخ محلہ، حول سرینگر کی ملکیت ہے۔تحقیقات سے معلوم ہوا ہے کہ مذکورہ جائیداد غیر قانونی منشیات کی اسمگلنگ سے حاصل شدہ آمدنی سے بنائی گئی تھی۔ چنانچہ، اسے این ڈی پی ایس ایکٹ کی متعلقہ دفعات کے تحت غیر قانونی طور پر حاصل کردہ اثاثہ قرار دے کر ضبط کر لیا گیا ہے۔
یہ کارروائی جموں و کشمیر پولیس کے اس عزم کی عکاسی کرتی ہے کہ وہ منشیات فروشوں کے مالی نیٹ ورکس کو ختم کرے اور معاشرے میں منشیات کے ناسور پر قابو پائے۔ پولیس نے اس بات کا اعادہ کیا ہے کہ منشیات فروشی میں ملوث افراد کے خلاف سخت کارروائی جاری رکھی جائے گی، اور عوام سے اپیل کی ہے کہ وہ منشیات کے استعمال اور اسمگلنگ سے متعلق معلومات فراہم کر کے اس مہم میں تعاون کریں۔
