سرینگر،: مرکزی وزیر شیوراج سنگھ چوہان نے منگل کے روز سرینگر کے ایس کے آئی سی سی میں پی ایم جی ایس وائی-IV (بیچ-II) کا آغاز کرتے ہوئے کہا کہ جموں و کشمیر کو جذباتی اور ترقیاتی دونوں حوالوں سے خصوصی اہمیت حاصل ہے۔
اجتماع سے خطاب کرتے ہوئے چوہان نے کہا کہ جامع ترقی کے لیے سڑکوں کا جال نہایت ضروری ہے اور سڑکوں کے بغیر ترقی نامکمل رہتی ہے۔ انہوں نے کہا کہ دور دراز علاقوں میں مناسب رابطہ نہ ہونے کی وجہ سے مسائل اب بھی برقرار ہیں۔
انہوں نے کہا کہ پی ایم جی ایس وائی-IV (بیچ-II) سے مرکز کے زیر انتظام علاقے میں دیہی رسائی اور بنیادی ڈھانچے میں نمایاں بہتری آئے گی۔
شیوراج سنگھ چوہان نے کہا کہ گزشتہ ایک سال کے دوران جموں و کشمیر میں مختلف دیہی ترقیاتی منصوبوں کے تحت تقریباً 8,000 کروڑ روپے کے منصوبوں کو منظوری دی گئی ہے۔
مرکزی وزیر نے اس بات کو دہرایا کہ تمام غریب خاندانوں کو رہائش فراہم کرنا حکومت کی ترجیح ہے اور کوئی بھی مستحق خاندان مستقل گھر سے محروم نہیں رہے گا۔
انہوں نے کہا کہ خواتین کو خود امدادی گروپوں کے ذریعے بااختیار بنایا جائے گا اور دیہی سطح پر خواتین کی کاروباری سرگرمیوں کو فروغ دیا جائے گا۔
زراعت کے حوالے سے شیوراج سنگھ چوہان نے کہا کہ خطے میں چھوٹی اور بکھری ہوئی زمینوں کے باعث کسانوں کی آمدنی بڑھانے کے لیے مخصوص حکمت عملی کی ضرورت ہے۔ انہوں نے کہا کہ حکومت مربوط زرعی نظام کو فروغ دے گی، جس کے تحت کسانوں کو زراعت، باغبانی، ماہی پروری، مویشی پروری اور شہد کی مکھیوں کی افزائش کو یکجا کر کے متعدد ذرائع آمدن پیدا کرنے کی ترغیب دی جائے گی۔
باغبانی کے حوالے سے انہوں نے کہا کہ ماضی میں کم معیار کے پودوں کی وجہ سے پیداوار متاثر ہوئی، خاص طور پر سیب اور اخروٹ کی کاشت میں۔
انہوں نے اعلان کیا کہ یونیورسٹی آف جموں و کشمیر کے اشتراک سے کلین پلانٹ پروگرام شروع کیا جائے گا، جس کے تحت تصدیق شدہ اور بیماریوں سے پاک پودے تیار کیے جائیں گے، جبکہ جدید نرسریاں بھی قائم کی جائیں گی تاکہ مقامی سطح پر معیاری پودے فراہم کیے جا سکیں۔
شیوراج سنگھ چوہان نے کہا کہ آئی سی اے آر کے سائنسدانوں کی ایک ٹیم جموں و کشمیر بھیجی جائے گی، جو زرعی و موسمی حالات، مٹی کی صحت، آبی وسائل اور فصلوں کی موزونیت کا جائزہ لے گی اور طویل مدتی زرعی و باغبانی ترقی کے لیے ایک سائنسی روڈ میپ تیار کرے گی۔
انہوں نے کہا کہ مرکزی حکومت اور یونین ٹیریٹری انتظامیہ دیہی تبدیلی کے ایجنڈے پر قریبی تعاون سے کام کریں گے۔مرکزی وزیر نے جموں و کشمیر کے نوجوانوں کی صلاحیتوں کو بھی اجاگر کرتے ہوئے کہا کہ مناسب مواقع فراہم کیے جائیں تو وہ عالمی سطح پر بہترین کارکردگی دکھا سکتے ہیں۔
اس موقع پر وزیر اعلیٰ عمر عبداللہ، نائب وزیر اعلیٰ سریندر چودھری، سینئر حکام اور عوامی نمائندے بھی موجود تھے۔ — (کے این او)
