سرینگر کے حج ہاؤس میں جذباتی مناظر، اہل خانہ کی الوداعی ملاقاتیں؛ سعودی عرب روانگی سے قبل آج 431 عازمین کی 3 پروازوں شیڈول
سرینگر: ہفتہ کی صبح حج ہاؤس سرینگر (بمنہ) میں آنسو، دعائیں اور دل کی گہری امیدیں فضا میں گھلی ہوئی تھیں جب کشمیر کا پہلا حج قافلہ سعودی عرب روانہ ہوا۔
یہ روانگی وادی کے سالانہ روحانی سفر کا آغاز تھی، جس میں اہل خانہ نے اپنے پیاروں کو مقدس حج کے سفر پر روانہ کرتے ہوئے نہایت جذباتی انداز میں الوداع کہا۔
خبر رساں ادارے کشمیر نیوز آبزرور (کے این او) کے مطابق، صبح سویرے ہی سینکڑوں اہل خانہ سرینگر کے بمنہ علاقے میں واقع مصروف ترین حج ہاؤس (بیت الحج) میں جمع ہوئے تاکہ اس سال حج کے لیے منتخب اپنے رشتہ داروں اور دوستوں کو الوداع کہہ سکیں۔
کچھ لوگ خاموشی سے گلے ملتے رہے، کچھ دعا کے لیے ہاتھ اٹھاتے رہے، جبکہ بہت سے افراد اپنے جذبات پر قابو نہ رکھ سکے کیونکہ روانگی کا وقت قریب آ رہا تھا۔
فضا میں عقیدت اور جدائی کا گہرا احساس چھایا ہوا تھا۔ بچے بزرگوں کو ہاتھ ہلا کر الوداع کہہ رہے تھے، خواتین اپنی آنکھوں سے آنسو پونچھ رہی تھیں جبکہ بزرگ عازمین تسبیح اور سفری دستاویزات تھامے خاموشی سے دعائیں پڑھ رہے تھے۔
سرینگر کے بزرگ عازم علی محمد میر نے حج ہاؤس کے دروازے میں داخل ہوتے ہوئے کہا:”یوں لگتا ہے کہ اللہ نے ہمیں اپنے گھر بلایا ہے۔ ہم نے اس لمحے کا برسوں انتظار کیا ہے۔”
ایک خاتون، جو اپنے والدین کو الوداع کہنے آئی تھیں، نے کہا:”آنسو اس لیے ہیں کہ وہ ہم سے دور جا رہے ہیں، لیکن خوشی اس بات کی ہے کہ وہ حج پر جا رہے ہیں۔ یہ ہمارے پورے خاندان کے لیے ایک بڑی نعمت ہے۔”
ایک اور رشتہ دار، سمیر نے کہا:”آج ہر گھر کا جذبات سے تعلق ہے۔ ہماری دعا ہے کہ تمام عازمین بخیریت حج مکمل کریں اور صحت وسلامت کے ساتھ واپس آئیں۔”
حج کمیٹی کے ایگزیکٹو آفیسر ڈاکٹر شجاعت احمد قریشی نے بتایا کہ پہلے دن تین پروازوں کے ذریعے مجموعی طور پر 431 عازمین کو روانہ کیا جا رہا ہے، جن میں 230 مرد اور 201 خواتین شامل ہیں۔
انہوں نے کہا:”پہلی پرواز میں 79 مرد اور 66 خواتین، دوسری میں 78 مرد اور 65 خواتین جبکہ تیسری پرواز میں 73 مرد اور 70 خواتین شامل ہیں۔”
انہوں نے مزید کہا کہ ٹرانسپورٹ، سامان کی ہینڈلنگ، طبی معائنہ اور دستاویزات کے تمام انتظامات پہلے ہی مکمل کر لیے گئے ہیں تاکہ روانگی کا عمل آسان اور منظم رہے۔
انہوں نے کہا۔”ہم نے عازمین کی سہولت کے لیے تمام ضروری انتظامات کیے ہیں اور صبح سے عمل مکمل طور پر ہموار رہا ہے،”
آج کی پہلی پرواز کے شیڈول کے مطابق، عازمین کو اپنے مقررہ وقت کے مطابق حج ہاؤس بمنہ، سرینگر پہنچنے کی ہدایت دی گئی ہے۔
QP-7521 (پہلی پرواز) کے مسافر 06:00 تا 06:30 بجے صبح، QP-7520 (دوسری پرواز) 08:15 تا 08:45 بجے، جبکہ QP-7519 (تیسری پرواز) 09:00 تا 09:30 بجے رپورٹ کریں گے۔
عازمین کو سختی سے ہدایت دی گئی ہے کہ وہ وقت کی پابندی کریں اور اپنا پاسپورٹ، ویزا کاپی، ویکسینیشن کارڈ اور صرف مقررہ سامان ساتھ رکھیں جبکہ ممنوعہ اشیاء سے اجتناب کریں۔ (کے این او)
