شاہ ہلال
اننت ناگ، 14 اپریل: وزیر اعلیٰ عمر عبداللہ نے منگل کے روز کہا کہ جموں و کشمیر میں جنگل راج کی اجازت نہیں دی جائے گی اور یہاں کے امن کو خراب کرنے کی کسی کو بھی اجازت نہیں ہوگی۔
بجبہارہ اننت ناگ میں صحافیوں سے بات کرتے ہوئے، عمر عبداللہ نے کہا کہ حکومت کا مقصد جموں و کشمیر میں ایک نئے دور کا آغاز کرنا ہے تاکہ ماحول پُرامن رہے اور حالات مستحکم رہیں۔
انہوں نے مزید کہا کہ کچھ لوگ ایسے ہیں جو ’جنگل راج‘ قائم کرنا چاہتے ہیں اور پُرامن فضا کو خراب کرنے کی کوشش کر رہے ہیں۔ انہوں نے کہا، "کچھ لوگ امن کو پسند نہیں کرتے اور فرقہ وارانہ کشیدگی اور تنازعات چاہتے ہیں، جیسا کہ آپ نے دیکھا ہے۔ میں یہ کہنا چاہتا ہوں کہ جب تک میری حکومت اقتدار میں ہے، ہم جموں و کشمیر میں ایسی کسی بھی چیز کو ہرگز ہونے نہیں دیں گے۔”
انہوں نے لیفٹیننٹ گورنر منوج سنہا سے اپیل کی کہ رامبن قتل کیس میں ملوث افراد اور حالات خراب کرنے کی کوشش کرنے والوں کے خلاف سخت کارروائی یقینی بنائی جائے۔ انہوں نے کہا، "اس سے ایک مضبوط پیغام جانا چاہیے کہ موجودہ حکومت ایسی بدامنی اور قانون شکنی کو ہرگز برداشت نہیں کرے گی۔”
