سری نگر، 14 اپریل: شہر ِ سرینگر کے چاند پورہ نوہٹہ علاقے میں منگل کی درمیانی شب پیش آنے والے آتشزدگی کے ایک واقعے میں سات رہائشی مکانات کو نقصان پہنچا۔
ایک اہلکار نے خبر رساں ادارے کشمیر نیوز آبزرور (کے این او) کو بتایا کہ آگ رات تقریباً ایک بجے بھڑک اٹھی، جس کے بعد فائر اینڈ ایمرجنسی سروسز کی ٹیمیں فوری طور پر جائے وقوعہ پر پہنچ گئیں۔
انہوں نے کہا کہ آگ پہلے ایک رہائشی مکان سے شروع ہوئی اور دیکھتے ہی دیکھتے قریبی گھروں تک پھیل گئی، جس کے باعث بڑے پیمانے پر نقصان ہوا۔
اہلکار کے مطابق، “فائر بریگیڈ کی گاڑیوں نے پولیس اور مقامی افراد کے ساتھ مل کر تقریباً ایک گھنٹے تک آگ پر قابو پانے کے لیے جدوجہد کی اور سخت محنت کے بعد شعلوں کو بجھا دیا گیا۔”
انہوں نے مزید بتایا کہ اس واقعے میں سات مکانات خاکستر ہوئے، تاہم خوش قسمتی سے کوئی جانی نقصان یا زخمی ہونے کی اطلاع نہیں ملی۔ آگ لگنے کی وجوہات کا ابھی تک تعین نہیں ہو سکا ہے۔ (کے این او)
