جموں،: جموں و کشمیر قانون ساز اسمبلی کا منظر جمعہ کے روز غیر معمولی طور پر ہنگامہ خیز رہا، جہاں ایک جانب مقامی تعلیمی مطالبات تو دوسری جانب بین الاقوامی صورتحال پر سیاسی ردعمل نے ایوان کی فضا کو کشیدہ بنائے رکھا۔ بجٹ اجلاس کے دوسرے مرحلے کے آغاز کے ساتھ ہی مختلف جماعتوں کے احتجاج نے کارروائی کو بار بار متاثر کیا اور ایوان میں سیاسی درجہ حرارت عروج پر رہا۔
بی جے پی ارکان کا لا یونیورسٹی کے قیام کے مطالبے پر احتجاج
ایوان میں سب سے پہلے بھارتیہ جنتا پارٹی (بی جے پی) کے ارکان نے نیشنل لا یونیورسٹی (این ایل یو) کے قیام کے مطالبے کو لے کر زور دار احتجاج کیا۔ ارکان اسمبلی نے حکومت سے مطالبہ کیا کہ جموں میں اس اعلیٰ تعلیمی ادارے کے قیام کے حوالے سے واضح اعلان کیا جائے۔ ان کا کہنا تھا کہ جموں کو طویل عرصے سے بڑے تعلیمی اداروں سے محروم رکھا گیا ہے۔ نعرہ بازی اور پلے کارڈز کے ساتھ کیے گئے اس احتجاج نے ایوان کی کارروائی کو کچھ دیر کے لیے متاثر بھی کیا۔
ایران پر امریکہ-اسرائیل کارروائی کے خلاف نیشنل کانفرنس کا احتجاج
اسی دوران حکمران جماعت نیشنل کانفرنس کے ارکان نے ایران کے خلاف امریکہ-اسرائیل کارروائی پر شدید ردعمل ظاہر کرتے ہوئے ایوان کے اندر احتجاج کیا۔ ارکان نے اس حملے کو عالمی اصولوں کی خلاف ورزی قرار دیتے ہوئے کہا کہ یہ کھلی جارحیت ہے جس نے عوامی جذبات کو مجروح کیا ہے۔ انہوں نے پلے کارڈز اٹھا کر نعرے بازی کی اور مطالبہ کیا کہ اس اہم بین الاقوامی مسئلے پر ایوان میں باضابطہ بحث کرائی جائے۔
ایران پر حملے کے خلاف کانگریس رکن کا اسمبلی کے باہر احتجاج
ادھر کانگریس کے رکن اسمبلی عرفان حفیظ لون نے اسمبلی کے باہر احتجاج کرتے ہوئے ایران پر حملے کی مذمت کی اور حکومت ہند کے ردعمل کو تنقید کا نشانہ بنایا۔ انہوں نے کہا کہ اس معاملے پر خاموشی اختیار کرنا باعث تشویش ہے۔ ان کے مطابق ایران پر حملہ “انسانیت کا قتل” ہے اور بھارت کو اپنی روایتی پالیسی کے مطابق مظلوم اقوام کے ساتھ کھڑا ہونا چاہیے۔ انہوں نے یہ بھی کہا کہ کشمیری عوام کی جانب سے ایران کے لیے دی جانے والی امداد انسانی ہمدردی کی عکاس ہے۔
ایران جنگ پر ہنگامہ آرائی، اسمبلی کی کارروائی 30 منٹ کے لیے ملتوی
صورتحال اس وقت مزید کشیدہ ہو گئی جب نیشنل کانفرنس ارکان نے ایوان میں ایران کے حق میں نعرے لگاتے ہوئے سابق ایرانی سپریم لیڈر آیت اللہ علی خامنہ ای کے پوسٹر لہرائے۔ اس پر بی جے پی ارکان نے سخت اعتراض کرتے ہوئے جوابی نعرے بازی شروع کر دی، جس سے ایوان میں گرما گرم بحث چھڑ گئی۔ اس دوران کانگریس کے عرفان حفیظ لون اور بی جے پی کے یودھویر سیتھی کے درمیان تلخ کلامی بھی ہوئی جو مداخلت کے بعد قابو میں آئی۔ بڑھتے ہوئے ہنگامے کے پیش نظر اسپیکر نے ایوان کی کارروائی 30 منٹ کے لیے ملتوی کر دی۔
کشمیر نیوز آبزرور
