تل ابیب،: اسرائیلی ذرائع ابلاغ کے مطابق بدھ کے روز وزیرِ اعظم بنیامین نیتن یاہو کے زیرِ استعمال خصوصی طیارے کو ممکنہ فضائی حملے کے خدشے کے پیشِ نظر ملک سے باہر بھیج دیا گیا۔ رپورٹ میں بتایا گیا ہے کہ یہ پیش رفت خطے میں بڑھتی ہوئی اسرائیل–ایران کشیدگی، امریکہ اور ایران کے درمیان سخت بیانات، اور اسرائیل میں تقریباً دو ہفتوں سے جاری احتجاجی مظاہروں کے پس منظر میں سامنے آئی ہے۔ اسی تناظر میں امریکی صدر ڈونلڈ ٹرمپ کی جانب سے تہران کے خلاف کارروائی کی دھمکیوں کا بھی حوالہ دیا جا رہا ہے۔
دوسری جانب ایرانی حکام نے واضح کیا ہے کہ کسی بھی امریکی فوجی اقدام کی صورت میں ایران مؤثر اور سخت ردِعمل دے گا۔
ادھر نیتن یاہو کے دفتر نے ان اطلاعات کی فوری تردید کرتے ہوئے کہا ہے کہ طیارے کی روانگی کسی ہنگامی صورتحال کا نتیجہ نہیں بلکہ ایک پہلے سے طے شدہ معمول کی تربیتی پرواز کا حصہ تھی۔
اس سے قبل فلائٹ ٹریکنگ ویب سائٹ نے وزیرِ اعظم کے طیارے کو نامعلوم سمت میں پرواز کرتے ہوئے ریکارڈ کیا تھا۔ دستیاب معلومات کے مطابق یہ طیارہ جنوبی اسرائیل میں واقع نفاتیم فضائی اڈے سے اڑان بھر کر اسرائیلی فضائی حدود سے باہر چلا گیا۔
