حیدرآباد:ہندوستانی خلاباز شبھانشوشکلا نے کہا ہے کہ انسان کو کبھی ایک ہی جگہ ٹھہر کر نہیں رہنا چاہیے۔ حال ہی میں انٹرنیشنل اسپیس اسٹیشن(آئی ایس ایس) کا کامیاب مشن مکمل کرکے وطن واپس شکلا نے حیدرآباد میں ملک کی سب سے بڑی نجی راکٹ فیکٹری اسکائی روٹ ایرو اسپیس کے انفینٹی کیمپس کی افتتاحی تقریب کے دوران حال ہی میں ایک تلگونیوزچینل کو دیئے گئے انٹرویو میں نئی نسل کو ملک کے خلائی سفر میں جوش و جذبہ اور تجسس کے ساتھ حصہ لینے کی ترغیب دی۔
فضائیہ کے گروپ کیپٹن اور اسروکے منتخب کردہ خلابازشکلا نے سال 2025 میں اسپیس ایکس کے ڈریگن خلائی جہاز کے ذریعہ ایکزیوم مشن 4 (Ax-4) میں حصہ لیا اور کامیابی کے ساتھ انٹرنیشنل اسپیس اسٹیشن پہنچے۔ اس طرح وہ آئی ایس ایس پر قیام کرنے والے پہلے ہندوستانی بن گئے۔
مشن کے دوران شکلا اور ان کی بین الاقوامی ٹیم نے تقریباً 18 دن خلا میں گزارے جہاں انہوں نے مائیکرو گریویٹی میں حیاتی علوم، میٹیریل سائنس، زمین کے مشاہدے اور انسانی جسمانیات سے متعلق مختلف سائنسی تجربات انجام دیئے۔
تمام تجربات اور سرگرمیاں مکمل کرنے کے بعدشبھانشوشکلا ا بحفاظت زمین پر واپس آگئے۔ یہ مشن ہندوستان کے لئے ایک اہم تاریخی سنگ میل ثابت ہوا، کیونکہ وہ آئی ایس ایس تک پہنچنے والے پہلے ہندوستانی ہیں۔ شکلا نے اپنے تجربات اور مستقبل کے ویژن پر روشنی ڈالی۔
انہوں نے اپنے کیریئر کے غیر متوقع موڑ کے بارے میں بات کرتے ہوئے کہا کہ فضائیہ کے ٹسٹ پائلٹ کے طور پر خدمات انجام دیتے ہوئے، جب خلا میں جانے کا موقع ملا تو یہ کوئی ‘سوچا سمجھا فیصلہ’ نہیں تھا بلکہ ایک ‘فطری اور فوری’ رد عمل تھا۔ ان کے مطابق، ہر شخص کا خواب آسمان کی وسعتوں سے نکل کر خلا تک پہنچنا ہوتا ہے۔
خلا باز کی حیثیت سے ان کی تربیت امریکہ، روس اور ہندوستان میں محیط تھی، جو کہ ‘چیلنج سے بھرپور’ تھی۔ تاہم، انہوں نے بین الاقوامی خلائی اسٹیشن میں گزارے گئے پہلے چند دنوں کو سب سے مشکل قرار دیا۔ شکلا نے وضاحت کی کہ ابتدائی دو سے تین دن جسم کو خلائی ماحول میں ڈھالنے میں دشواری ہوتی ہے، جس کی وجہ سے کام کرنا مشکل ہو جاتا ہے، لیکن اس کے بعد جسم عادی ہو جاتا ہے۔
شبھانشوشکلا نے خاص طور پر نوجوانوں کے لیے ایک اہم پیغام دیتے ہوئے کہا کہ جوش و خروش اور تجسس برقرار رکھیں۔ انہوں نے کہا کہ ہندوستان اپنے خلائی سفر کے ایک ‘بہت ہی شاندار’ راستے پر گامزن ہے۔ انہوں نے نوجوانوں پر زور دیا کہ وہ اس سفر میں سرگرمی سے حصہ لیں اور صرف یہ نہ سوچیں کہ یہ کسی اور کا کام ہے۔
یواین آئی
