خرطوم: مغربی سوڈان میں شمالی دارفور کے دارالحکومت الفشیر میں ایک مہاجر کیمپ کے اندر بازار کو نشانہ بناتے ہوئے نیم
فوجی ریپڈ سپورٹ فورسز (آر ایس ایف) کے حملے میں بدھ کے روز کم از کم 14 افراد ہلاک ہوگئے۔
ایک مقامی افسر نے یہ معلومات فراہم کی ہیں۔ شمالی دارفور ریاست کے ہیلتھ اتھارٹی کے ڈائریکٹر جنرل ابراہیم خاطر نے بتایا، "آج جب آر ایس ایف ملیشیا نے ابو شوک کیمپ کے ایک معروف بازار پر گولہ باری کی تو 14 افراد ہلاک اور کئی دیگر زخمی ہوگئے۔
” اس دوران ابو شوک کیمپ کے ایمرجنسی روم کے ایک رضاکار گروپ نے بدھ کے روز ایک مختصر بیان میں تصدیق کی کہ آر ایس ایف کے حملے میں کیمپ کے اندر نیالہ بازار کو نشانہ بنایا گیا، جس میں 14 افراد ہلاک اور دیگر زخمی ہوگئے۔ آر ایس ایف نے ابھی تک اس حملے پر کوئی تبصرہ نہیں کیا۔ 10 مئی 2024 سے الفشیر میں ایک طرف سوڈانی مسلح افواج (ایس اے ایف) اور اس کے اتحادیوں اور دوسری طرف آر ایس ایف کے درمیان شدید جھڑپیں ہوئی ہیں۔ الفشیر دارفور خطے کا انتظامی مرکز ہے، جس میں پانچ ریاستیں شامل ہیں۔ یہ خطے کا سب سے بڑا شہر اور واحد ریاستی دارالحکومت ہے جو آر ایس ایف کے کنٹرول سے باہر ہے۔ سوڈان میں ایس اے ایف اور آر ایس ایف کے درمیان تنازع جاری ہے۔ اس تنازع میں ہزاروں
افراد کی جانیں جا چکی ہیں اور لاکھوں افراد بے گھر ہوگئے ہیں۔
یواین آئی
