سری نگر: جموں وکشمیر اپنی پارٹی کے صدر سید الطاف بخاری اور پیپلز کانفرنس کے صدر سجاد لون نے سری نگر کے نشاط علاقے میں ایک خانہ بدوش خاتون کی ہلاکت کے واقعے کی فوری تحقیقات کرانے کا مطالبہ کیا ہے۔واضح رہے کہ سری نگر کے نشاط علاقے میں اتوار کو ایک خانہ بدوش خاتون کی لاش پر اسرار طور پر بر آمد کی گئی۔
الطاف بخاری نے پیر کو ‘ایکس’ پر اپنے ایک پوسٹ میں کہا: ‘ نشاط میں پیش آنے والا المناک واقعہ، جس میں ریاسی سے تعلق رکھنے والی ایک خانہ بدوش خاتون کو نشے میں دھت افراد کے ایک گروہ نے وحشیانہ حملہ کر کے قتل کر دیا، ہولناک اور انتہائی شرمناک ہے’۔انہوں نے مطالبہ کہا: ‘اس گھناؤنے جرم میں ملوث افراد کو انصاف کے کٹہرے میں لایا جائے’۔موصوف صدر نے متاثرہ کنبے کے ساتھ اظہار تعزیت کرتے ہوئے کہا: ‘تسلی کے کوئی الفاظ صحیح معنوں میں اس درد کو کم نہیں کر سکتے جس کا وہ اس وقت سامنا کر رہے ہوں گے’۔سجاد لون نے اس واقعے کی فوری تحقیقات کرانے کا مطالبہ کرتے ہوئے کہا: ‘ نشاط کے علاقے میں ایک خانہ بدوش خاتون کو جنسی زیادتی کا نشانہ بنا کر قتل کر دیا گیا’انہوں نے مطالبہ کیا کہ مجرمان کو تیز بنیادوں پر سخت سزا ملنی چاہئے’۔
ادھر سری نگر پولیس نے گذشتہ روز ہی اس واقعے کا نوٹس لے کر پولیس اسٹیشن نشاط میں ایک مقدمہ درج کرکے 4 ملزموں کو گرفتار کیا ہے۔سری نگر پولیس نے ‘ایکس’ پر ایک پوسٹ میں کہا: ‘ سری نگر پولیس نے واٹر ورکس روڈ، نشاط کے قریب ایک خاتون کے ساتھ جنسی زیادتی کے ایک رپورٹ کے واقعے کا نوٹس لیا ہے، جسے شدید چوٹیں آئیں اور بعد میں اس کو ہسپتال میں مردہ قرار دے دیا گیا’۔انہوں نے پوسٹ میں کہا: ‘قانون کی متعلقہ دفعات کے تحت پولیس اسٹیشن نشاط میں ایک ایف آئی آر درج کی گئی اور جرم میں ملوث چار ملزمان کو گرفتار کر لیا گیا ہے’۔پوسٹ میں کہا گیا کہ اس ضمن میں مزید تفتیش جاری ہے۔
