سری نگر: جموں وکشمیر اپنی پارٹی نے جمعرات کو یہاں بجلی فیس میں اضافے اور غیر طے شدہ بجلی کٹوتی کے خلاف احتجاج درج کیا۔احتجاجی جم کر نعرہ بازی کر رہے تھے اور کچھ احتجاجیوں نے ہاتھوں میں بجلی بلب اور بینرس بھی اٹھا رکھے تھے۔
گرچہ انہوں نے پارٹی دفتر سے باہر نکلنے کی کوشش کی تاہم انہیں پولیس نے روک دیا۔اس موقع پر پارٹی کے سینئر لیڈر منتظر محی الدین نے میڈیا کو بتایا: ‘ہم پر امن احتجاج کرنا چاہتے ہیں فیس نہ بھرنے کی وجہ سے بہت سارے لوگوں کے بجلی کنکشن کاٹے جا رہے ہیں ہم چاہتے ہیں کہ ماہ رمضان کے پیش نظر ان کو قسطوں میں بجلی فیس ادا کرنے کا موقع دیا جائے اور جو مارچ تک محکمے نے ایمنسٹی رکھی ہے اس کی مدت کو مزید بڑھایا جائے’۔
انہوں نے کہا: ‘ہمارا یہ بھی مطالبہ ہے کہ بجلی فیس میں کمی کی جائے’۔ان کا کہنا تھا: ‘جو حکومت نے 2 سو یونٹ مفت بجلی فراہم کرنے کا وعدہ کیا تھا جب تک اس وعدے کو عملی جامہ پہنایا جائے تب تک لوگوں کو کوئی سہولیت ملنی چاہئے’۔موصوف لیڈر نے کہا کہ اپنی پارٹی لوگوں کے مطالبوں کے لئے ہمیشہ آواز بلند کرے گی۔
