بدھ, فروری ۱۲, ۲۰۲۵
11.7 C
Srinagar

رکن پارلیمان آغا روح اللہ کی وزیر خارجہ سے سعودی عرب میں قید کشمیری شہری کی رہائی کے لئے اپیل

سری نگر: نیشنل کانفرنس کے سینئر لیڈر اور سری نگر کے رکن پارلیمان آغا سید روح اللہ نے سعودی عرب میں ایک کشمیری شہری کی گرفتاری کے معاملے میں وزیر خارجہ ایس جئے شنکر سے مداخلت کرنے کی اپیل کی ہے۔ذرائع کے مطابق سری نگر کے صورہ علاقے سے تعلق رکھنے والے انجینئر عبدالرفیع بابا سعودی عرب کے ایک جیل میں قید ہیں۔
آغا سید روح اللہ مہدی کے دفتر نے اپنے ایکس ہینڈل پر ایک پوسٹ میں کہا: ‘اہم اپیل:روح اللہ مہدی نے وزیر خارجہ ڈاکٹر جئے شنکر کو ایک کشمیری شہری کے سعودی عرب کے ایک جیل میں قید ہونے کے متعلق ایک خط لکھا ہے’۔
پوسٹ میں کہا گیا: ‘انہوں نے مذکورہ قیدی کی جلد رہائی اور بحفاظت گھر واپسی پر زور دیا اور امید ظاہر کی کہ وزارت خارجہ فوری مدد کو یقینی بنائے گی’۔رفیع بابا کے ولد منظور الحق ایک دہائی قبل روز گار کی تلاش میں سعودی عرب گئے تھے اور کشمیر میں ان کا کوئی مجرمانہ ریکارڈ نہیں تھا۔منظور الحق کا کہنا ہے: ‘ یکم مارچ 2020 کو ہم یہ جان کر حیران رہ گئے کہ اسے سعودی حکام نے گرفتار کر لیا ہے، اس کو کنگ فیصل یونیورسٹی، حفوف الحسا میں ان کے کام کی جگہ سے نامعلوم وجوہات کی بنا پر اٹھایا گیا تھا’۔انہوں نے کہا: ‘ گرچہ ہم اس کے خلاف الزامات سے لاعلم ہیں، اس کے ساتھیوں نے ہمیں بتایا کہ اسے ان کی کمپنی کے اندرونی مسائل کی وجہ سے گرفتار کیا گیا تھا اور اس پر بدنیتی کا الزام لگایا گیا’۔
منظور الحق جو عمر رسیدہ بھی ہیں اور علیل بھی ہیں، نے اپنے بیٹے کا مقدمہ لڑنے سے بے بسی کا اظہارکیا۔انہوں نے کہا: ‘میں سعودی عرب کا سفر کرنے اور وہاں کے حکام سے رابطہ کرنے سے قاصر ہوں، میری اہلیہ کا انتقال ہوا ہے اور میری کوئی معاون نہیں ہے’۔ان کا کہنا تھا: ‘ایک بار مجھے بیٹے کی فون کال آئی تو اس نے مجھے بتایا کہ اس کو من گھڑت مقدمات میں پھنسایا گیا چونکہ کوئی بھی اس کے کیس کی سرگرمی سے پیروی نہیں کر رہا ہے، اس لیے وہ سعودی عدالتوں سے انصاف حاصل کرنے سے قاصر ہے’۔
مالی طور پر مشکلات کا شکار ہونے کے باعث یہ خاندان سعودی عرب جانے یا رفیع بابا کے لیے قانونی مدد حاصل کرنے سے قاصر ہے انہوں نے حکومت پر زور دیا ہے کہ وہ مداخلت کرے اور ان کی رہائی میں سہولت فراہم کرے۔
دریں اثنا جموں و کشمیر اسٹوڈنٹس ایسوسی ایشن نے بھی وزیر خارجہ ڈاکٹر ایس جئے شنکر کو خط لکھ کر رفیع بابا کے پریشان کن معاملے میں مداخلت کرنے کی اپیل کی ہے۔ ایسوسی ایشن نے سعودی حکومت سے فوری طور پر سفارتی رابطہ قائم کرنے کا مطالبہ کیا ہے تاکہ اس کے کیس کی منصفانہ تحقیقات کو یقینی بنایا جا سکے اور اس کی ہندوستان واپسی میں آسانی ہو۔

Popular Categories

spot_imgspot_img