نئی دہلی،: مرکزی وزیر داخلہ امت شاہ بدھ کو یہاں بیورو آف پولیس ریسرچ اینڈ ڈیولپمنٹ کے 54 ویں یوم تاسیس کی تقریب میں بطور مہمان خصوصی شامل ہوں گے اور ’نئے فوجداری قانون – شہریوں پر مرکوز اصلاحات‘ کے عنوان پر ڈاکٹر آنندسوروپ گپتا میموریل لیکچردیں گے۔
وزیر داخلہ 2023 اور 2024 کے لیے صدارتی تمغہ برائے نمایاں خدمات اور صدارتی تمغہ برائے امتیازی خدمات حاصل کرنے والوں کوبھی اعزاز دیں گے۔ وزیر داخلہ نئے فوجداری قوانین پر بیورو کی اشاعت ‘انڈین پولیس جرنل’ کا خصوصی ایڈیشن بھی جاری کریں گے۔
بیورو ملک کی پولیس فورسز کو ضروری فکری، جسمانی اور تنظیمی وسائل سے لیس کرکے پولیسنگ اور داخلی سلامتی کے چیلنجوں کا کامیابی سے مقابلہ کرنے کے لیے انہیں چست درست فورس بنانے کے لیے پرعزم ہے۔
سال 1970 میں اپنے قیام کے بعد سے، بیورو تحقیق اور ترقی میں پولیسنگ میں عمدگی کو فروغ دینے کے لیے ہندوستانی پولیس کے تھنک ٹینک کے طور پر خدمات انجام دے رہا ہے۔ انسٹی ٹیوٹ کی توجہ پولیس اور اصلاحی خدمات کے لیے پالیسیاں اور طریقہ کار وضع کرنا، شہریوں کو بہتر خدمات کی فراہمی کے لیے ٹیکنالوجیز کو تلاش کرنا، قانون نافذ کرنے والی ایجنسیوں کی صلاحیت کی تعمیر نیز ریاستوں اور مرکزی پولیس تنظیموں کے درمیان تعاون اور ہم آہنگی کو فروغ دینا ہے۔
افتتاحی تقریب میں مرکزی داخلہ سکریٹری گووند موہن، سنٹرل آرمڈ پولیس فورسز کے ڈائرکٹر جنرل، مرکزی پولیس تنظیموں کے سربراہان کے ساتھ ساتھ وزارت داخلہ اور دیگر محکموں کے سینئر افسران بھی شرکت کریں گے۔
یواین آئی
