جموں: جموں وکشمیر نیشنل کانفرنس کے صدر ڈاکٹر فاروق عبداللہ نے پیر کے روز کہا کہ ہم اس وقت ایک مشکل ترین دور سے گذر رہے ہیں، یہ وہ شیطانی دور ہے جو الفاظ میں بیان نہیں کیا جاسکتا.انہوں نے کہاکہ ہمیں ہر حال میں پُرعزم اور ثابت قدم رہ کر چیلنجوں کا سامنا کرناہے۔ان باتوں کا اظہار موصوف نے بلیسہ میں عوامی جلسے سے خطاب کے دوران کیا۔
انہوں نے کہا کہ اس وقت لوگوں کو تقسیم کیا جارہاہے، لوگوں کو مذہبی بنیادوں پر لڑوایا جارہاہے، علاقائی بنیادوں پر پھوٹ ڈالا جارہاہے اور لسانی بنیادوں پر نفرتیں پھیلائیں جارہی ہیں۔نفرتیں پھیلانے کا رجحان اس قدر بڑھ گیاہے کہ اب ملک کے وزیر اعظم بھی اس ریس میں آگے آگے ہیں۔
فاروق عبداللہ نے کہا کہ جواہر لعل نہرو سے لیکر منموہن سنگھ تک میں نے کبھی بھی کسی وزیرا عظم کو لوگوں کو مذہبی بنیادوں پر تقسیم کرتے نہیں دیکھا لیکن جو ہمارے موجودہ وزیر اعظم ہیں ، انہوں نے الیکشن کے دوران مسلمانوں کیخلا ف جو زہرافشائی کی گئی انتہائی شرمناک اور تشویشناک ہے۔
ایک وزیر اعظم کی زبان سے یہ کہناکہ اگر بھاجپا نہیں جیتی تو جس ہندو کے پاس دو گھر ہونگے یا دو مویشی ہونگے اُن میں سے ایک مسلمان کو دیا جائے گا، ہندو شادی شدہ خواتین کے منگل سوتر مسلمانوں کو دیئے جائیں۔ اسی لئے میں کہتا ہوں کہ یہ ایک شیطانی دور ہے اور اس میں لوگوں کو صرف تقسیم کیا جارہاہے۔
انہوں نے کہا کہ یہاں جو حدبندی کی گئی وہ بھی تقسیمی بنیادوں پر کی گئی، نہیں تو اننت ناگ کو راجوری پونچھ کیساتھ جوڑنے کا کیا مقصد ہے۔ یہاں خطہ چناب میں بھی تقسیمی بنیادوں پر حدبندی کی گئی لیکن انشاءاللہ لوگ سوچ سمجھ کر اور تقسیمی عناصر کو مسترد کریں گے۔ کورپشن،بے روزگاری، مہنگائی اور احتساب کے فقدان کے چیلنجوں پر اتحاد کے ذریعے ہی قابو پایا جا سکتا ہے۔
ان کے مطابق جوں جوں آئندہ انتخابات قریب آرہے ہیں، فرقہ پرست طاقتوں کو قابو میں رکھنے اور جمہوریت کے تقدس کو برقرار رکھنے کےلئے دانشمندانہ فیصلے کیے جانے چاہئیں۔ اتحاد ہماری طاقت ہے، اور ان لوگوں کے خلاف متحد ہونا ضروری ہے جو ہمیں تقسیم کرنا چاہتے ہیں۔
0ڈاکٹر فاروق عبداللہ کی شاہ فرید الدین بغدادیؒ اور شاہ اسرار الدین ولیؒ کی درگاہوں پر حاضری
صدرِ نیشنل کانفرنس ڈاکٹر فاروق عبداللہ نے آج حضرت شاہ فرید الدین بغدادی ؒاور حضرت شاہ اسرار الدین ولیؒکی قدیم اور تاریخی دگارہوں پر حاضری دی۔ انہوں نے اس موقعے پر نہوں نے اس موقعے پر اسلام کی سربلندی اور فتح ونصرت کے علاوہ عالم انسانیت کی بقاءاور فلسطینی عوام کی فتح و نصرت کیلئے دعا کی۔انہوں نے اللہ تعالیٰ سے دعا کی کہ جموں وکشمیر میں مکمل امن و امان اور یہاں کے لوگوں کو خوشحالی اور فارغ البالی نصیب ہو۔ ڈاکٹر فاروق کا کہنا تھا بزرگانِ دین، ریشیانِ کرام، صوفیانِ حضرات کی درگاہیں ہمارے دلوں کے سکون اور اسلامی تہذیب و تمدن کے گہوارے رہے ہیں۔
یہ درگارہیں صدیوں سے عقیدتمندوں کی آماجگاہ بنی ہوئی ہے۔اللہ تعالیٰ اپنے نیک بندوں کی دعائیں قبول فرماتا ہے۔ ڈاکٹر فاروق عبداللہ نے اُمید ظاہر کی کہ اللہ تعالیٰ بزرگانِ دین کے طفیل جموں وکشمیر کے عوام کو موجودہ چیلنجوں سے نجات دلائیں گے۔ اُن کے ہمراہ صوبائی صدر جموں ایڈوکیٹ رتن لعل گپتا، چناب ویلی زون صدر سجاد احمد کچلو، قاضی جلال الدین، سجاد شاہین، اسرار خان، تنویر کچلو، وجے لوچن، ڈی ڈی سی چیئرپرسن پوجا ٹھاکر، عمران قاضی اور دیگر عہدیداران بھی تھے۔
