سری نگر،19 اکتوبر : سرحدی ضلع کپوارہ کے لنگیٹ علاقے میں بدھ کی صبح سیکورٹی فورسز کی ایک مشترکہ ٹیم نے ایک آئی ای ڈی بر آمد کی جس کو بعد میں بغیر کوئی نقصان پہنچائے ناکارہ بنا دیا گیا۔
سرکاری ذرائع نے بتایا کہ کپوارہ کے وڑی پورہ لنگیٹ علاقے میں پولیس اور فوج کی 30 آر آر کی ایک مشترکہ گشتی ٹیم نے ایک فوجی کیمپ کے نزدیک ایک آئی ای ڈی پائی اور فوراً اس روڈ پر ٹریفک اور لوگوں کی نقل و حمل کو بنا بر احتیاط روک دیا۔
انہوں نے کہا کہ بعد ازاں بم ناکارہ بنانے والی ایک ٹیم کو جائے موقع پر طلب کیا گیا جس نے اس آئی ای ڈی کو بغیر کوئی نقصان پہنچائے ناکارہ بنا دیا۔
آئی ای ڈی کو ناکارہ بنانے کے بعد روڈ پر ٹریفک اور لوگوں کی نقل و حمل بحال کر دی گئی۔
دریں اثنا پولیس نے واقعے کی تصدیق کرتے ہوئے کہا کہ اس ضمن میں ایک کیس درج کرکے تحقیقات شروع کی گئی ہیں۔
