جموں/جموں کے میران صاحب علاقے میں ایک فوجی جوان نے مبینہ طور پر اپنی سروس رائفل سے اپنے آپ کو گولی مار کر اپنی زندگی تمام کردی۔ذرائع نے بتایا کہ میران صاحب جموں کے کلیان کیمپ کے اندر ایک فوجی جوان نے بدھ کے روز اپنی ہی سروس رائفل سے اپنے آپ کو گولی ماردی جس کے نتیجے میں ان کی برسر موقع ہی موت واقع ہوئی۔
متوفی کی شناخت کمار ساکن ہماچل پردیش کے بطور ہوئی ہے۔انہوں نے کہا کہ فوجی جوان کی طرف سے یہ انتہائی قدم اٹھانے کی وجوہات ابھی معلوم نہیں ہوسکی ہیں۔
دریں اثنا پولیس نے معاملے کا نوٹس لیتے ہوئے اس ضمن میں ایک کیس درج کیا ہے۔جموں و کشمیر کے حالات پر گہری نظر رکھنے والے مبصرین کا کہنا ہے کہ سکیورٹی فورسز اہلکاروں میں خودکشی کے بڑھتے ہوئے رجحان کی وجہ سخت ڈیوٹی، اپنے عزیز و اقارب سے دوری اور گھریلو و ذاتی پریشانیاں ہیں۔
انہوں نے کہا کہ اگرچہ حکومت نے سیکورٹی اہلکاروں کے لئے یوگا اور دیگر نفسیاتی ورزشوں کو لازمی قرار دیا ہے لیکن باوجود اس کے جموں و کشمیر میں جوانوں کی جانب سے خودکشی کے واقعات گھٹنے کی بجائے بڑھ رہے ہیں۔
یو این آئی
