سالانہ امر ناتھ یاترا :یاترا روٹوں پر خالی عمارتوں میں اضافی اہلکار رہیں گے، ‘آر او پی’ کے بغیر یاترا گاڑی کو آگے جانے کی اجازت نہیں ہوگی

سری نگر،13جون: سالانہ امر ناتھ یاترا کو خوش اسلوبی کے ساتھ پایہ تکمیل تک پہنچانے کی خاطر جہاں ایک طرف 350 کے قریب اضافی پیرا ملٹری فورسز کی کمپنیاں پچھلے دس روز سے وارد کشمیر ہو رہی ہیں وہیں امسال پہلی بار ‘آر او پی’ کے بغیر یاترا گاڑی کو آگے جانے کی اجازت نہیں ہوگی۔
ذرائع نے بتایا کہ بھگوتی نگر سے لے کر پوترا شیو لنگم تک جتنے بھی یاترا روٹ آتے ہیں وہاں پر اضافی اہلکاروں کی تعیناتی عمل میں لائی جارہی ہے
انہوں نے کہا کہ ”آر او پی “یعنی روڑ اوپنگ پارٹی کے بغیر کسی بھی یاترا گاڑی کو سری نگر کی طرف جانے کی اجازت نہیں دی جائے گی۔
معلوم ہوا ہے کہ یاترا روٹوں کے اردگرد خالی عمارتوں میں اضافی اہلکاروں کو رکھا جائے گا۔
ذرائع کا یہ بھی کہنا ہے کہ زیر تعمیر سرکاری عمارتوں میں بھی اضافی پیراملٹری فورسز کی کمپنیاں قیام کریں گے۔
دریں اثنا سالانہ امر ناتھ یاترا کے دوران یاتریوں کی حفاظت کے لئے پہلی دفعہ ”آر او پی “پارٹی بھی ساتھ رہیں گی۔
ذرائع کے مطابق کسی بھی یاترا گاڑی کو ”روڑ اوپنگ پارٹی “کے بغیر بھگوتی نگر سے سری نگر کی طرف جانے کی اجازت نہیں دی جائے گی۔
ذرائع کا کہنا ہے بھگوتی نگر جموں سے سری نگر کی طرف آر او پی پارٹی کے ہمراہ ہی یاترا گاڑیوں کو آگے جانے کی اجازت دی جائے گی۔
انہوں نے کہا کہ سری نگر- جموں قومی شاہراہ پر یاترا گاڑیوں کو آسان راہداری فراہم کرنے اور سماج دشمن عناصر کے منصوبوں کو ناکام بنانے کی خاطر اس طرح کا فیصلہ لیا گیا ہے۔
باوثوق ذرائع کے مطابق سیکورٹی ایجنسیوں کے سینئر آفیسران کو اس ضمن میں مرکزی وزارت داخلہ کی جانب سے ہدایت دی گئی ہے کہ وہ یاترا کے دوران (ایس او پیز ) پر سختی کے ساتھ عمل کریں اور آر او پی کے بغیر کسی بھی یاترا گاڑی کو آگے جانے کی اجازت نہیں دینی چاہئے۔
ذرائع کے مطابق چونکہ اس بار سیکورٹی خدشات کے پیش نظر مرکزی وزارت داخلہ کی ہدایت پریاترا کے دوران 350پیرا ملٹری فورسز کی کمپنیاں تعینات رہیں گے۔
ذرائع نے بتایا کہ سی آر پی ایف، بی ایس ایف ، سی آئی ایس ایف، آئی ٹی بی پی اور ایس ایس بی اہلکار یاترا روٹوں پر تعینات رہیں گے۔
انہوں نے بتایا کہ سری نگر جموں شاہراہ پر ، ننون بیس کیمپ ، پہلگام اور بالہ تل میں فوج کی تعیناتی کو بھی خارج از امکان قرار نہیں دیا جارہا ہے۔
اُن کے مطابق سیکورٹی ایجنسیوں نے ایسے حساس علاقوں کی نشاندہی کی ہے جہاں پر چوبیس گھنٹے ڈرونز کے ذریعے نگرانی کی جائے گی ۔
نگرانی کی خاطر اینٹی ڈرون ٹیکنالوجی کا بھی استعمال عمل میں لایا جا رہا ہے۔
حکومتی ذرائع کا کہنا ہے کہ اس بات آٹھ لاکھ سے زائد یاتری پوترا شیو لنگم کے درشن کی خاطر وارد وادی ہوں گے۔

یو این آئی