سری نگر،03 جون: جنوبی ضلع اننت ناگ کے کپرن ویری ناگ گاوں میں ملی ٹینٹوں اور فورسز کے مابین گولیوں کا تبادلہ ہوا ہے۔
پولیس کے ایک ترجمان نے بتایا کہ سیکورٹی فورسز کویہ اطلاع موصول ہوئی کہ ملی ٹینٹ جنوبی ضلع اننت ناگ کے کپرن ویری ناگ علاقے میں چھپے بیٹھے ہیں تو پولیس اور فوج نے جمعے کی سہ پہر کو مشترکہ طور پر فوراً اس علاقے کو محاصرے میں لے لیا اور اُنہیں ڈھونڈ نکالنے کے لئے کارروائی شروع کی ۔
انہوں نے بتایا کہ فرار ہونے کے تمام راستے مسدود پا کر ملی ٹینٹوں نے حفا ظتی عملے پر اندھادھند فائرنگ شروع کی ، چنانچہ سلامتی عملے نے بھی پوزیشن سنبھال کر جوابی کارروائی کا آغاز کیا اور اس طرح سے طرفین کے مابین جھڑپ شروع ہوئی۔
موصوف ترجمان نے بتایا کہ سیکورٹی فورسز نے ایک وسیع علاقے کو محاصرے میں لے کر فرار ہونے کے سبھی راستوں پر پہرے بٹھا دئے۔
ذرائع نے بتایا کہ علاقے میں دو سے تین ملی ٹینٹ محصور ہیں جنہیں مار گرانے کی خاطر اضافی کمک کوطلب کیا گیا ہے۔
آخری اطلاعات موصول ہونے تک علاقے میں رک رک کر گولیوں کا تبادلہ جاری تھا۔
اس سلسلے میں مزید تفصیلات کا انتظار ہے۔
یو این آئی
