سری نگر،12 مارچ: جموں وکشمیر کی گرمائی راجدھانی سری نگر کے پارمپورہ علاقے میں ہفتے کی دوپہر کو رہائشی مکان سے آگ نمودار ہوئی جس نے دیکھتے ہی دیکھتے پوری بستی کو اپنی لپیٹ میں لے لیا۔
آگ کی اس واردات کے دوران 20 کے قریب رہائشی ٹین شیڈ، ایک گودام ، ایک دکان اور ایک کار خاکستر ہو گئی۔
سرکاری ذرائع نے بتایا کہ ہفتے کی دوپہر کو پارمپورہ سری نگر میں ایک رہائشی مکان سے آگ نمودار ہوئی جس نے آناً فاناً پوری بستی کو لپیٹ میں لے لیا۔
انہوں نے کہا کہ فائر اینڈ ایمرجنسی عملے کے اہلکار فوری طورپر جائے موقع پر پہنچے اور آگ بجھانے کی کارروائی شروع کی تاہم آتشزدگی کی اس واردات کے دوران 20 کے قریب ڈھانچے مکمل طورپر خاکستر ہوئے ہیں۔
انہوں نے نے مزید بتایا کہ ایک درجن کے قریب فائر ٹینڈروں کی مدد سے آگ پر قابو پایا گیا تاہم لاکھوں روپیہ مالیت کی گھریلو اشیاء تباہ وبرباد ہوئی۔
اُن کے مطابق بیس کے قریب رہائشی ڈھانچے خاکستر ہونے کے باعث درجنوں کنبے کھلے آسمان تلے زندگی گزارنے پر مجبور ہو گئے ہیں۔
مقامی ذرائع نے بتایا کہ آتشزدگی کی اس بھیانک واردات کے دوران 20 سے زائد رہائشی ڈھانچوں کو نقصان پہنچا ہے ۔
ابتدائی تفتیش میں آگ لگنے کی وجہ شارٹ سرکٹ بتائی گئی ہے۔
پولیس نے آگ لگنے کی وجوہات جاننے کی خاطر کیس درج کرکے مزید تحقیقات شروع کی ہے۔
یو این آئی
