سری نگر، 11 جنوری : جموں وکشمیر کے سرحدی ضلع کپواڑہ کے کیرن علاقے میں ایک فوجی جوان نے مبینہ طورپر اپنی ہی سروس رائفل سے اپنا کام تمام کردیا۔
سرکاری ذرائع نے بتایا کہ ضلع کپواڑہ کے کاچہال کیرن علاقے میں منگل کی شام کو ایک فوجی جوان نے اپنی ہی سروس رائفل سے زندگی کا چراغ گل کیا۔
انہوں نے بتایا کہ گولی کی آواز سنتے ہی وہاں موجود دوسرے فوجی اپنے ساتھی کی طرف دوڑ پڑے اور اس کو خون میں لت پت پایا۔
مذکورہ ذرائع نے بتایا کہ اگر چہ فوجی جوان کو نزدیکی ہسپتال پہنچایا گیا لیکن وہاں ڈاکٹروں نے اس کو مردہ قرار دیا۔
متوفی جوان کی شناخت 41 سالہ حوالدار گرجیت سنگھ کے بطور ہوئی ہے ۔
جموں و کشمیر کے حالات پر گہری نظر رکھنے والے مبصرین کا کہنا ہے کہ سکیورٹی فورسز اہلکاروں میں خودکشی کے بڑھتے ہوئے رجحان کی وجہ سخت ڈیوٹی، اپنے عزیز و اقارب سے دوری اور گھریلو و ذاتی پریشانیاں ہیں۔
انہوں نے کہا کہ اگرچہ حکومت نے سیکورٹی اہلکاروں کے لئے یوگا اور دیگر نفسیاتی ورزشوں کو لازمی قرار دیا ہے لیکن باوجود اس کے جموں و کشمیر میں جوانوں کی جانب سے خودکشی کے واقعات گھٹنے کی بجائے بڑھ رہے ہیں_
یو این آئی
