سری نگر/ حکام نے شمالی کشمیر کے ضلع کپوارہ میں ایک سرپنچ سمیت تین افراد کو مبینہ طور پر منشیات فروخت کرنے کے الزام میں پبلک سیفٹی ایکٹ (پی ایس اے) کے تحت حراست میں لیا ہے۔
ایک پولیس ترجمان نے بتایا کہ گرفتار شدگان منشیات فروخت کرکے مقامی نوجوانوں کو اس کی لت میں ڈال رہے تھے۔گرفتار شدگان کی شناخت 42 سالہ منظور احمد لون جو درد پورہ لولاب کا سرپنچ ہے، ولد عبدلاجبار لون ساکن درد پورہ لولاب، بلال احمد گنائی ولد ثناواللہ گنائی ساکن بٹہ پورہ کپوارہ اور طارق احمد بٹ ولد غلام نبی بٹ ساکن لال پورہ کپوارہ کے بطور ہوئی ہے۔
ایس ایس پی کپوارہ یوگل منہاس کا کہنا ہے کہ منشیات اسمگلروں کے خلاف سخت کاررائی عمل میں لانا پولیس کی ترجیحات میں شامل ہے۔انہوں نے کہا کہ مذکورہ تین منشیات اسمگلروں کے خلاف کارروائی ہماری اسی کوشش کی ایک کڑی ہے۔
موصوف ایس ایس پی نے نوجوانوں کو نشے کی لت سے دور رہنے کی تاکید کرتے ہوئے لوگوں سے اس وبا کا قلع قمع کرنے میں پولیس کو مدد کرنے کی اپیل کی۔
یو این آئی
