سری نگر/ جموں وکشمیر کے گرمائی دارلخلافہ سری نگر کے زیون پانتھ چوک علاقے میں جنگجوؤں کے حملے میں زخمی ہونے والے پولیس اہلکاروں میں سے ایک اور پولیس اہلکار زخموں کی تاب نہ لا کر دم توڑ گیا اور اس طرح مہلوکین کی تعداد بڑھ کر 3 ہوگئی۔
سرکاری ذرائع نے بتایا کہ زیون حملے میں زخمی ہونے والے پولیس اہلکاروں میں سے ایک اور پولیس اہلکار منگل کی صبح زخموں کی تاب نہ لا کر دم توڑ گیا۔انہوں نے کہا کہ اس طرح مہلوکین کی تعداد بڑھ کر تین ہوگئی۔متوفی پولیس اہلکار کی شناخت کانسٹیبل رمیض احمد ولد محمد امین ساکن یچھ ہامہ گاندر بل کے بطور ہوئی ہے۔
بتادیں پیر کی شام جنگجوؤں نے سری نگر کے زیون علاقے میں آرمڈ پولیس کی ایک گاڑی پر حملہ کر دیا جس کے نتیجے میں گاڑی میں سوار 14 پولیس اہلکار زخمی ہوگئے۔
پولیس نے بتایا کہ زخمیوں کو فوری طور پر فوج کے بادامی باغ ہسپتال میں داخل کیا گیا جہاں دو پولیس اہلکار زخموں کی تاب نہ لا کر گذشتہ رات کو ہی دم توڑ گئے۔
مہلوکین کی شناخت اسسٹنٹ سب انسپکٹر غلام حسن ساکن رام بن اور کانسٹیبل شفیق علی ساکن مہور ریاسی کے بطور ہوئی تھی۔پولیس کے مطابق یہ حملہ جیش محمد نامی جنگجو تنظیم کی ذیلی تنظیم ’کشمیر ٹائیگرز‘ نے کیا تھا۔
یو این آئی
