سری نگر/ کشمیر زون پولیس کے انسپکٹر جنرل وجے کمار کا کہنا ہے کہ زیون حملہ جیش محمد جنگجو تنظیم سے وابستہ تین جنگجوؤں نے انجام دیا جن میں سے دو غیر مقامی جبکہ ایک مقامی جنگجو تھا۔انہوں نے کہا کہ جنگجوؤں کا مقصد پولیس پر حملہ کرکے ان سے ہتھیارو چھیننا تھا۔
ان کا کہنا تھا کہ پولیس کی جوابی فائرنگ میں ایک جنگجو زخمی ہوا ہے جس کے خون کے نشانات سے معلوم ہوتا ہے کہ جنگجو پہلے پانپور کی طرف بھاگے ہیں اور اس کے بعد انہوں نے ترال پلوامہ کا رخ کیا ہے۔
موصوف آئی جی پی نے ان باتوں کا اظہار منگل کے روز یہاں مہلوک پولیس اہلکاروں کی میت پر پھول مالا چڑھانے کی تقریب کے حاشئے پر نامہ نگاروں کے سوالوں کے جواب دینے کے دوران کیا۔
انہوں نے کہا: ’کل (پیر کی) شام کو چھ بجے آرمڈ پولیس کی ایک گاڑی جس میں 25 جوان بیٹھے ہوئے تھے پر جیش محمد نامی جنگجو تنظیم سے وابستہ تین جنگجوؤں نے اندھا دھند گولیاں چلائیں جس کے نتیجے میں پولیس کے 14 جوان زخمی ہوگئے‘۔ان کا کہنا تھا: ’زخمیوں کو فوری طور ہسپتال منتقل کیا گیا جن میں سے دو اہلکار کل رات کو ہی دم توڑ گئے جبکہ تیسرا منگل کی صبح دم توڑ بیٹھا‘۔
مسٹر کمار نے کہا کہ باقی زخمی پولیس اہلکاروں کی حالت خطرے سے باہر ہے۔انہوں نے کہا کہ حملہ آور تین جنگجوؤں میں سے دو غیر مقامی ہیں جبکہ تیسرا مقامی جنگجو ہے اور جیش محمد نے خود بھی اس حملے کی ذمہ داری قبول کی ہے۔
موصوف انسپکٹر جنرل نے کہا کہ پولیس جوانوں نے بھی جوابی کارروائی کی جس کے نتیجے میں ایک جنگجو زخمی ہوگیا۔انہوں نے کہا: ’زخمی جنگجو کے خون کے نشانات دور دور تک ہیں جن سے معلوم ہوتا ہے کہ جنگجو پہلے پانپور کی طرف بھاگے ہیں اور اس کے بعد انہوں نے ترال پلوامہ کا رخ کیا ہے‘۔
ان کا کہنا تھا کہ جنگجوؤں کے حملے کا مقصد پولیس اہلکاروں کے ہتھیار چھیننا تھا۔ایک سوال کے جواب میں وجے کمار نے کہا کہ یہ ایک منصوبہ بند حملہ تھا کیونکہ پولیس کی یہ گاڑی روز اس سڑک سے گذرتی ہے۔انہوں نے کہا کہ پولیس کافی چاک و چوبند ہے اور پولیس اہلکاروں کو ایک جگہ سے دوسرے جگہ جانے کے لئے بلٹ پروف گاڑیاں فراہم کی جائیں گی۔ان کا کہنا تھا کہ حملہ آور جنگجوؤں کے متعلق پولیس کو کافی سراغ مل گئے ہیں اور اس گروپ کو بہت جلد پکڑا یا مارا جائے گا۔
یو این آئی
