شمالی ضلع بانڈی پورہ میں جنگلی ریچھ زندہ پکڑلیا گیا

سری نگر، 30 نومبر :شمالی کشمیر کے بانڈی پورہ ضلع کے آرگام علاقے میں ایک بھاری برکم ریچھ کو زندہ پکڑ لیا گیا ہے۔
محکمہ وائلڈ لائف کے ایک سینئر آفیسر نے یو این آئی اردو کو بتایا کہ ’آرگام بانڈی پورہ میں ریچھ کی نقل وحرکت کی اطلاع موصول ہونے کے بعد متعلقہ محکمے نے ایک پنجرہ نصب کیا تھا‘۔انہوں نے کہا کہ ریچھ زندہ پکڑ لیا گیا اور اس کو وائلڈ لائف سنچری منتقل کیا گیا ہے۔
قابل ذکر ہے کہ وادی کشمیر میں جنگلی جانوروں کا آبادی والے علاقوں میں گھومنا پھرنا ایک معمول سا بن گیا ہے۔لوگوں کا کہنا ہے کہ جنگلی جانور اب بالائی علاقوں تک ہی محدود نہیں رہ گئے بلکہ میدانی علاقوں میں بھی نمودار ہونے لگے ہیں جس سے وادی میں خوف وہراس پھیل گیا ہے۔
ماہرین کا کہنا ہے کہ جنگلوں کی کٹائی اوروہاں مناسب خوراک اور پناہ کی عدم دستیابی جنگلی جانوروں کے بستیوں کی طرف رخ کرنے کی بنیادی وجہ ہے۔