سری نگر/ فی فکزیشن اینڈ ریگولیشن کمیٹی (ایف ایف آر سی) نے سالانہ فیس (انیول چارجز) وصولنے کی شکایات کا سنگین نوٹس لیتے ہوئے پرائیویٹ سکولوں کو یہ فیس وصولنے سے باز رہنے کی تاکید کرتے ہوئے کہا ہے کہ خلاف ورزی کرنے والوں کے خلاف سخت کارروائی کی جائے گی۔
کمیٹی کے چیرپرسن جسٹس (ر) مظفر حسین عطار کی طرف سے جاری ایک حکمنامے میں انکشاف کیا گیا ہے کہ کمیٹی کو پیرنٹس ایسوسی ایشن آف پرائیویٹ سکولز کشمیر کی جانب سے ایک درخواست موصول ہوئی ہے جس میں الزام لگایا گیا ہے کہ پرائیویٹ سکول حکام کمیٹی کے احکامات کا غلط استعمال کرکے دھوکہ دہی سے والدین سے انیول فیس وصول کر رہے ہیں۔
حکمنامے میں کہا گیا: ’والدین کو فیس فکزیشن کمیٹی کا آرڈر دکھا کریہ کہا جاتا ہے کہ اب ہمارے سکول کے لئے کمیٹی نے انیول فیس مقرر کردیا ہے اس لئے انہیں موجودہ سیشن اور سابقہ تعلیمی سیشن کا انیول فیس وصول کرنے کی اجازت دی گئی ہے‘۔
موصوف چیئر پرسن، جنہوں نے جموں وکشمیر ہائی کورٹ میں بطور سینئر جج فرائض انجام دئے ہیں ،نے حکمانے میں کہا ہے کہ کمیٹی قانونی اختیارات کے تحت سکولوں کا فیس مقرر کررہی ہے اوراس حوالے سے ٹیوشن فیس کے ساتھ ساتھ انیول فیس بھی مقرر کیا جاتا ہے۔
انہو ں نے حکمنامے میں کہا: ’چنانچہ سکول کورونا وبا کے باعث ابھی بھی بند ہیں اس لئے سکول کھلنے تک انہیں سرکاری اور ایف ایف آر سی کے احکامات کے تحت ہی فیس وصول کرنا ہوگا۔
انہوں نے حکومت کی جانب سے 14مئی 2020 کو جاری کردہ ایک حکمنامے کا حوالہ دیا ہے جس میں سکولوں کو صرف ٹیوشن فیس لینے کی اجازت دی گئی ہے البتہ سالانہ فیس کے متعلق واضح طور پر کہا گیا ہے کہ وہ صرف سکول کھلنے پر ہی ماہانہ طور پر یہ فیس وصول کرسکتے ہیں ۔
مسٹر مظفر حسین عطار نے کہا ہے کہ فی فکزیشن کمیٹی نے 18مارچ 2021 کو ایک قرار داد منظور کی جس میں مذکورہ سرکاری سرکیولر کی توثیق کی گئی ہے۔
انہوں نے واضح کیا ہے کہ مذکورہ سرکیولر ابھی بھی لاگو ہے اور تب تک لاگو رہے گا جب تک سکول دوبارہ کھلیں گے اس لئے سکول حکام پر لازم ہے کہ وہ اس سرکاری حکمنامے پر عمل کریں جس کی ایف ایف آر سے نے بھی توثیق کی ہے ۔
انہو ں نے کہا ہے کہ فی فکزیشن کمیٹی ٹیوشن فیس کے ساتھ ساتھ انیول فیس بھی مقرر کر رہی ہے لیکن اس کا یہ مقصد نہیں ہے کہ سکول حکام کو سالانہ فیس وصول کرنے کی اجازت دی گئی ہے۔ جسٹس مظفر حسین عطار نے کہا ہے کہ یہ وضاحت اس لئے ضروری بن گئی ہے کیونکہ کمیٹی کو شکایات موصول ہورہی ہیں کہ کچھ والدین کوفی کمیٹی کا آڈر دکھا کر سالانہ ل فیس اداکرنے کے لئے مجبور کیا جاتاہے۔
انہوں نے کہا ہے کہ سکول کھلنے کے بعد ہی پرائیویٹ سکول حکام کمیٹی کی جانب سے مقرر کردہ سالانہ فیس وصول کرنے کے مجاز ہون گے۔
موصوف چیئر پرسن نے اس صورتحال کے پیش نظر تمام سکول انتظامیوں کو ہدایت دی ہے کہ وہ سالانہ چارج سرکار کی طرف سے 14مئی 2020 کو جاری سرکیولر کے مطابق ہی وصول کرسکتے ہیں۔
یو این آئی
