سری نگر/ شمالی کشمیر کے ضلع کپوارہ کے کرال پورہ علاقے میں پیر کی صبح ایک سڑک حادثے میں ایک 32 سالہ جوان کی موت جبکہ تین دیگر زخمی ہوگئے۔
سرکاری ذرائع نے بتایا کہ کپوارہ جا رہی ایک کار پیر کی صبح کرال پورہ کے نزدیک سڑک سے لڑھک کر ایک گہری کھائی میں جا گری جس کے نتیجے میں اس میں سوار چار افراد زخمی ہوگئے۔
انہوں نے بتایا کہ زخمیوں کو فوری طور سب ضلع ہسپتال ٹنگڈار منتقل کیا گیا لیکن ان میں سے ایک مسافر زخموں کی تاب نہ لا کر راستے ہی میں دم توڑ گیا۔
متوفی کی شناخت 32 سالہ نثار احمد خان ولد غلام حسن خان ساکن کرال پورہ کے بطور ہوئی ہے جبکہ زخمیوں کی شناخت 24 سالہ اقبال احمد ولد عبدالرشید، 33 سالہ الطاف احمد ولد عبدالرشید اور عاشق حسین بٹ ولد عبداللہ بٹ ساکنان کرال پورہ کے بطور ہوئی ہے۔
دریں اثنا ایک پولیس افسر نے واقعے کی تصدیق کرتے ہوئے کہا ہے کہ اس ضمن میں ایک کیس درج کرکے تحقیقات شروع کی گئی ہیں۔
یو این آئی
