سری نگر/ جموں و کشمیر کے ضلع پلوامہ میں سیکیورٹی فورسز اور جنگجووں کے درمیان زبردست تصادم ہوا۔یہ اطلاع پولیس کے ایک ترجمان نے جمعہ کے روز دی۔ انہوں نے بتایا کہ جنگجووں کی موجودگی کے بارے میں خفیہ اطلاعات کی بنیاد پر ریاستی پولیس کے خصوصی آپریشن گروپ، سنٹرل ریزرو پولیس فورس (سی آر پی ایف) اور راشٹریہ رائفل (آر آر) نے جمعرات کی تاخیر شب پلوامہ کے کاک پورہ میں محاصرے اور تلاشی مہم کا آغاز کیا۔
انہوں نے بتایا کہ جب سیکیورٹی فورسز کے جوان کاک پورہ کی گھیرابندی کرکے ایک خاص علاقے کی جانب بڑھ رہے تھے تبھی وہاں چھپے ہوئے جنگجووں نے خودکار ہتھیاروں سے فائرنگ شروع کردی۔ اس کے بعد سیکیورٹی فورسز نے بھی جوابی کارروائی کرتے ہوئے گولیاں برسائیں۔
پولیس کے ترجمان نے بتایا کہ بعد میں اندھیرے کی وجہ سے تلاشی مہم روک دی گئی ۔ انہوں نے بتایا کہ آج صبح جب سیکیورٹی فورسز کے جوان جنگجووں کی موجودگی والے علاقے کی جانب بڑھ رہے تھے تو جنگجووں نے فائرنگ شروع کردی۔ انہوں نے بتایا کہ حتمی اطلاع ملنے تک سیکیورٹی فورسز اور جنگجووں کے مابین فائرنگ کا سلسلہ جاری تھا۔
ادھر ایک اطلاع کے مابق انکائونٹر کے مقام پر مشتعل مظاہرین اور سیکیورٹی فورسز کے مابین شدید نوعیت کی جھڑپوں میں ایک دوشیزہ سمیت2زخمی ہوئے ۔مزید تفصیلات کا انتظار ہے۔
یو این آئی /کے این او
