وقت آگیا ہے کہ ہندوستان اور پاکستان رنجشوں کو یکطرف کر کے کشمیر کا حل تلاش کریں: محبوبہ مفتی

سری نگر، 19 مارچ:پی ڈی پی صدر و سابق وزیر اعلیٰ محبوبہ مفتی کا کہنا ہے کہ ہندوستان اور پاکستان کے لئے اچھا موقع ہے کہ وہ رنجشوں کو یکطرف کر کے کشمیر مسئلے کا دیرپا حل تلاش کریں۔
انہوں نے کہا کہ دونوں ممالک کو اپنے وسائل ایک دوسرے پر سبقت لے جانے کے بجائے عوام کی فلاح و بہبودی پر صرف کرنے چاہئے۔
موصوفہ ان باتوں کا اظہار جمعے کو اپنے ایک ٹویٹ میں کیا۔ انہوں نے یہ ٹویٹ پاکستان کے فوجی سربراہ جنرل قمر جاوید باجوہ کے بیان کہ ہندوستان اور پاکستان کے لئے وقت آیا ہے کہ وہ ماضی کو دفنا کر آگے بڑھیں، کے رد عمل میں کیا۔
محبوبہ مفتی نے اپنے ٹویٹ میں کہا: ‘ہندوستان اور پاکستان کے لئے اچھا موقع ہے کہ وہ رنجشوں کو یکطرف کر کے کشمیر کا دیرپا حل تلاش کریں۔ دونوں ممالک کو ایک دوسرے پر سبقت لینے کے لئے بہت بڑا فوجی بجٹ ہے جبکہ ان ہی وسائل کو مشترکہ چیلنجز جیسے غربت، تعلیم اور صحت عامہ پر صرف کیا جا سکتا ہے’۔
یو این آئی