کشمیر: موسلا دھار بارشوں کا سلسلہ جاری، سردی میں قدرے اضافہ درج

سری نگر، 11 مارچ : وادی کشمیر میں گذشتہ چوبیس گھنٹوں سے رک رک کر بارشوں کا سلسلہ جاری ہے جس سے سردی میں قدرے اضافہ درج ہوا ہے۔
ادھر محکمہ موسمیات کی پیش گوئی کے مطابق وادی کشمیر میں 15 مارچ تک موسم خراب رہنے کا امکان ہے۔
متعلقہ محکمے کے ایک ترجمان نے بتایا کہ وادی کشمیر میں 15 مارچ تک برف وباراں متوقع ہے اور اس دوران 11 سے 13 مارچ تک موسم زیادہ خراب رہنے کا امکان ہے۔
ان کا کہنا تھا کہ خراب موسمی صورتحال کے باعث کشمیر شاہراہ پر ٹریفک کی نقل و حمل متاثر ہو سکتی ہے۔
خراب موسمی حالات کے پیش نظر باغ مالکان سے کہا گیا ہے کہ وہ 15 مارچ تک اپنے باغوں کی دوا پاشی کرنے سے احتراز کریں۔
دریں اثنا وادی کشمیر میں جمعرات کی صبح سے رک رک کر موسلا دھار بارشوں کا سلسلہ شروع ہوا جس سے دن میں سردی میں قدرے اضافہ درج ہوا۔
موسلا دھار بارشوں سے وادی کے شہر و گام کی سڑکیں، سڑکیں کم جھیل جھرنے زیادہ نظر آرہے ہیں۔
لوگوں کا کہنا ہے کہ سڑکوں پر بنے گڑھوں میں جمع پانی سے جب گاڑیوں چلتی ہیں تو چھینٹیں دور دور تک پیدل چلنے والوں کو اپنی لپیٹ میں لے کر کہیں کا نہیں چھوڑتی ہیں۔
انہوں نے کہا کہ عمر رسیدہ افراد، خواتین اور بچوں کے لئے گھروں سے باہر نکلنا محال بن گیا ہے کیونکہ کیچڑ سے بھری سڑکوں پر چلنا ان کے بس کی بات نہیں ہے۔
وادی میں جاری خراب موسمی حالات کے پیش نظر لوگوں نے ایک بار پھر گرم لباس اور کانگڑیوں کے علاوہ گھروں، دفاتر اور دیگر کام کی جگہوں پر گرمی کے الیکٹرک آلات کا استعمال کرنا شروع کیا ہے۔
محکمہ موسمیات کے ایک ترجمان کے مطابق گرمائی دارلحکومت سری نگر میں کم سے کم درجہ حرارت 6.8 ڈگری سینٹی گریڈ ریکارڈ کیا گیا۔
قابل ذکر ہے کہ سری نگر میں جہاں ماہ جنوری میں سردیوں کا پچیس سالہ ریکارڈ ٹوٹ گیا جب 31 جنوری کو کم سے کم درجہ حرارت منفی 8.8 ڈگری سینٹی گریڈ ریکارڈ ہوا تھا وہیں ماہ فروری میں گرمیوں کا 57 سالہ ریکارڈ پاش پاش ہوگیا جب فروری کی ایک شب کم سے کم درجہ حرارت 8.0 ڈگری سینٹی گریڈ ریکارڈ ہوا تھا۔
وادی کے مشہور زمانہ سیاحتی مقام گلمرگ میں کم سے کم درجہ حرارت منفی 1.5 ڈگری سینٹی گریڈ ریکارڈ کیا گیا جبکہ دوسرے مشہور سیاحتی مقام پہلگام میں کم سے کم درجہ حرارت 1.6 ڈگری سینٹی گریڈ ریکارڈ ہوا ہے۔
سرحدی ضلع کپوارہ میں کم سے کم درجہ حرارت 4.4 ڈگری سینٹی گریڈ جبکہ قاضی گنڈ میں کم سے کم درجہ حرارت 5.7 ڈگری سینٹی گریڈ اور ککر ناگ میں کم سے کم درجہ حرارت 4.3 ڈگری سینٹی گریڈ ریکارڈ کیا گیا۔
یو این آئی