سرینگر/صدرِ نیشنل کانفرنس و ممبر پارلیمنٹ ڈاکٹر فاروق عبداللہ نے آج آثار شریف درگاہ حضرت بل میں حاضری دی اور وہیں نماز جمعہ بھی ادا کی۔ڈاکٹر فاروق نے اس موقعہ پر جموں وکشمیر میں مکمل امن و امان، عالم اسلام کی سربلندی، عالم انسانیت کی بقا، ریاست کے لوگوں کی خوشحالی و ترقی کے علاوہ ہندوستان اور پاکستان کے درمیان مضبوط دوستی ، دونوں پڑوسی ممالک کے لوگوں کی خوشحالی و فارغ البالی اور مسئلہ کشمیر کے حل کے لئے دعا کی۔
اس سے قبل ڈاکٹر فاروق عبداللہ نے چرار شریف جاکر وہاں درگاہِ حضرت علمدار کشمیر شیخ نور الدین نورانیؒ پر حاضری دی۔ اُن کے ہمراہ پارٹی کے سینئر لیڈران اور سابق وزیر خزانہ ایڈوکیٹ عبدالرحیم راتھر بھی تھے۔ اس موقعے پر دونوں لیڈران کی دستاربندی کی گئی اور خصوصی دعاﺅں کا اہتمام کیا گیا۔
