سری نگر: وادی کشمیر کو بیرون دنیا کے ساتھ جوڑنے والی سری نگر۔ جموں قومی شاہراہ پر بدھ کے روز سیول ٹریفک کی نقل وحمل پر کوئی پابندی عائد نہیں رہی اور گاڑیوں کو جموں سے سری نگر روانہ ہونے کی اجازت دی گئی۔
محکمہ ٹریفک کے ایک ترجمان نے بتایا کہ ‘متعلقہ نوڈل ایجنسی یعنی سی آر پی ایف نے ہمیں بذریعہ ٹیلی فون مطلع کیا کہ 17 اپریل 2019 کو شاہراہ پر کسی بھی فوجی کانوائے کی آمد ورفت نہیں ہے لہذا پہلے جاری کئے گئے ٹریفک شیڈول میں ترمیم کی جاتی ہے اور بدھ کو شاہراہ پر ٹریفک حسب معمول چلے گا’۔
واضح رہے کہ حکام نے قومی شاہراہ پر سیول ٹریفک کی نقل وحمل پر ہفتے میں دو دن اتوار اور بدھ وار کو پابندی عائد کر رکھی ہے اس دوران شاہراہ پر صرف فوجی قافلوں کو چلنے کی اجازت ہے۔
ترجمان نے بتایا کہ بدھ کے روز گاڑیوں کو جموں سے سری نگر روانہ ہونے کی اجازت دی گئی مخالف سمت سے کسی بھی گاڑی کو چلنے کی اجازت نہیں دی گئی۔
ادھر سی آر پی ایف نے شاہراہ پر سیول ٹریفک کی نقل وحمل پر پابندی کے دوران ڈوڈہ سے تعلق رکھنے والے ایک مریض کی موت واقع ہونے میں اعلیٰ سطحی تحقیقات کرنے کے احکامات صادر کئے ہیں۔
قابل ذکر ہے کہ وادی کو ملک کے ساتھ جوڑنے والی سری نگر۔ جموں قومی شاہراہ جو اہلیان وادی کے لئے شہہ رگ کی حیثیت رکھتی ہے، پر حکومت کی طرف سے سیول ٹریفک کی نقل وحمل پر ہفتے میں دو روزہ پابندی پر وادی کے تمام سیاسی، مزاحمتی، سماجی و تجارتی تنظیموں نے صدائے احتجاج بلند کیا ہے۔
جہاں نیشنل کانفرنس نے اس حکم نامے کی سخت مذمت کی وہیں پی ڈی پی نے بھی اس سرکاری فیصلے کو غلط قرار دیا یہاں تک ایک سابق فوجی سربراہ نے اس فیصلے کو خیال ناقص قرار دیا۔
نیشنل کانفرنس کے صدر اور سابق وزیر اعلیٰ ڈاکٹر فاروق عبداللہ نے شاہراہ پر ہفتے میں دو روزہ پابندی کے حوالے سے کہا کہ اگر اس عوام مخالف حکم نامے کو فوراً واپس نہیں لیا گیا تو کشمیر میں ایسی صورتحال پیدا ہوگی جس کو کنٹرول کرنا مشکل ہوگا۔
پی ڈی پی صدر محبوبہ مفتی نے کہا کہ کشمیر فلسطین نہیں ہے، کشمیریوں کو اپنی سڑکوں پر چلنے سے کوئی نہیں روک سکتا۔سابق آئی اے ایس افسر اور جموں و کشمیر پیپلز موومنٹ کے چیئرمین ڈاکٹر شاہ فیصل نے سری نگر۔ جموں قومی شاہراہ سیول ٹریفک کی نقل وحمل کے لئے ہفتے میں دودن بند رہنے کے سرکاری حکم نامے کے خلاف جموں وکشمیر ہائی کورٹ کا دوروازہ کھٹکھٹایا ہے۔
