سرینگر: شیر کشمیر انسٹی ٹیوٹ آف میڈیکل سائنسز (سکمز) کے ڈائریکٹر و ای او ایس جی پروفیسر ایم اشرف گنائی نے مسلسل بارشوں اور خراب موسمی حالات کے نتیجے میں پانی جمع ہونے کے بعد پیر کو سکمز میڈیکل کالج اسپتال بمنہ کا تفصیلی معائنہ کیا۔
دورے کے دوران ڈائریکٹر سکمز نے زمینی صورتحال کا جائزہ لیا اور پانی جمع ہونے سے مریضوں کی دیکھ بھال اور اسپتال کی خدمات پر پڑنے والے اثرات کا معائنہ کیا۔ انہوں نے مریضوں، تیمارداروں اور طبی عملے کو درپیش مشکلات پر تشویش کا اظہار کرتے ہوئے پرنسپل سکمز میڈیکل کالج اور میڈیکل سپرنٹنڈنٹ کو ہدایت دی کہ معمول کی صورتحال فوری طور پر بحال کرنے کے لیے اقدامات کیے جائیں۔
ڈائریکٹر نے انجینئرنگ ونگ کو ہدایت دی کہ پانی نکالنے کے لیے مناسب ڈی واٹرنگ پمپس تعینات کیے جائیں اور اسپتال کے احاطے میں جمع پانی کی فوری نکاسی کے لیے تمام دستیاب وسائل بروئے کار لائے جائیں۔
پروفیسر اشرف گنائی نے کہا کہ مریضوں کو بلا تعطل طبی سہولیات کی فراہمی اولین ترجیح ہے۔ انہوں نے کہا کہ سیلابی خطرے سے دوچار اسپتال کیمپس میں بار بار پانی جمع ہونے کے مسئلے کا حل عارضی اقدامات کے بجائے جامع اور پائیدار منصوبہ بندی کے ذریعے تلاش کرنا ہوگا۔
انہوں نے پرنسپل سکمز میڈیکل کالج کو ہدایت دی کہ ایک ہفتے کے اندر تفصیلی رپورٹ پیش کی جائے، جس میں پانی جمع ہونے کی وجوہات، فوری اقدامات اور طویل مدتی تدارکی حکمت عملی شامل ہو۔
ڈائریکٹر نے اسپتال کے لیے مستقل فلڈ مینجمنٹ منصوبہ تیار کرنے کی غرض سے اعلیٰ سطحی کمیٹی تشکیل دینے کا بھی اعلان کیا۔ انہوں نے کہا کہ کمیٹی کی سفارشات کو اعلیٰ حکام کے سامنے پیش کیا جائے گا تاکہ خراب موسمی حالات میں اسپتال کے کام کاج کو محفوظ رکھنے کے لیے مستقل بنیادی ڈھانچے کے اقدامات کیے جا سکیں۔
ڈائریکٹر سکمز نے یقین دہانی کرائی کہ مریضوں کی بلا تعطل دیکھ بھال یقینی بنانا اولین ترجیح ہے اور مستقبل میں ایسی صورتحال کے دوبارہ پیدا ہونے سے روکنے کے لیے ہر ممکن اقدامات کیے جائیں گے۔
دریں اثنا ڈائریکٹر سکمز و ای او ایس جی پروفیسر ایم اشرف گنائی کے موقع پر معائنے اور فوری اقدامات کی ہدایات کے بعد اسپتال کے احاطے سے پانی کی نکاسی کا عمل مکمل کر لیا گیا ہے۔
تمام طبی خدمات دوبارہ بحال کر دی گئی ہیں اور اسپتال معمول کے مطابق کام کر رہا ہے۔ڈائریکٹر نے تمام سروس اور معاون شعبہ جات کی جانب سے ہنگامی صورتحال سے نمٹنے کے لیے فوری اور مربوط اقدامات کو سراہا، جن کی بدولت اسپتال کے معمول کے آپریشنز جلد بحال ہوئے اور مریضوں کو بلا تعطل طبی سہولیات کی فراہمی یقینی بنائی جا سکی۔
