کمیٹی نے تحریری وضاحت، ریکارڈ شدہ انٹرویو، شائع شدہ مواد اور متعلقہ دستاویزات بھی طلب کر لیں
سرینگر، 2 جولائی: چائلڈ ویلفیئر کمیٹی (سی ڈبلیو سی) سرینگر نے ایک مقامی نیوز پورٹل کو مبینہ طور پر ایک کمسن بچے کا اس کے والدین یا قانونی سرپرست کی باخبر رضامندی حاصل کیے بغیر اور متعلقہ اسکول انتظامیہ کی اجازت یا علم کے بغیر انٹرویو لینے اور ویڈیو ریکارڈ کرنے کے معاملے میں طلب کیا ہے۔
نیوز ایجنسی کشمیر نیوز آبزرور (کے این او) کے مطابق، کمیٹی نے فیئر وائس نیوز، سرینگر کے ایڈیٹر یا مجاز نمائندے کو ہدایت دی ہے کہ وہ 3 جولائی 2026 کو دوپہر 12 بجے چائلڈ ویلفیئر کمیٹی کے دفتر، سرینگر میں پیش ہوں۔
سمن میں مزید کہا گیا ہے کہ متعلقہ رپورٹر یا انٹرویو لینے والا شخص، کیمرہ پرسن اور انٹرویو کے دوران موجود دیگر میڈیا اہلکار بھی مجاز نمائندے کے ہمراہ کمیٹی کے سامنے پیش ہوں۔
چائلڈ ویلفیئر کمیٹی کے مطابق، اگر الزامات درست ثابت ہوئے تو یہ عمل جووینائل جسٹس (نگہداشت اور تحفظِ اطفال) ایکٹ، 2015 کے تحت بچوں کو حاصل حقوق کی خلاف ورزی تصور کیا جا سکتا ہے۔ اس کے علاوہ یہ نیشنل کمیشن فار پروٹیکشن آف چائلڈ رائٹس (این سی پی سی آر) کی جانب سے بچوں کی شناخت، رازداری، وقار اور بہترین مفاد کے تحفظ سے متعلق میڈیا رہنما اصولوں کی بھی خلاف ورزی ہو سکتی ہے۔
کمیٹی نے نیوز پورٹل سے ایک تحریری وضاحت بھی طلب کی ہے، جس میں یہ بتایا جائے کہ کن حالات میں مذکورہ انٹرویو کیا گیا۔ اس کے علاوہ ریکارڈ شدہ انٹرویو کی نقل، شائع یا نشر کیے گئے مواد، حاصل کی گئی کسی بھی رضامندی یا اجازت نامے کی کاپی اور دیگر تمام متعلقہ دستاویزات بھی پیش کرنے کی ہدایت دی گئی ہے۔
سمن میں خبردار کیا گیا ہے کہ اگر متعلقہ فریق کمیٹی کے سامنے پیش نہ ہوا یا مطلوبہ معلومات اور دستاویزات فراہم نہ کیں تو اس کے خلاف قانون کے مطابق مناسب کارروائی کی جا سکتی ہے۔
