اننت ناگ،05 مئی: منشیات کی اسمگلنگ اور نارکوٹکس نیٹ ورک کے خلاف مسلسل کارروائی کے سلسلے میں، اننت ناگ پولیس نے ایک اور اہم قدم اٹھاتے ہوئے منشیات سے حاصل شدہ آمدنی سے بنائی گئی جائیداد کو این ڈی پی ایس ایکٹ کے تحت منسلک (ضبط) کر لیا۔
پولیس اسٹیشن سری گفوارہ نے این ڈی پی ایس ایکٹ کی دفعہ 68(F) کے تحت کارروائی کرتے ہوئے ایک منزلہ رہائشی مکان، جس کی تخمینہ شدہ مارکیٹ مالیت تقریباً 85 لاکھ روپے ہے، منسلک کیا۔ یہ جائیداد ا متیاز احمد گنائی ولد لسہ گنائی، ساکن شلگام، سری گفوارہ کی ملکیت ہے۔
مذکورہ ملزم پولیس اسٹیشن سری گفوارہ میں درج ایف آئی آر نمبر 72/2022 میں این ڈی پی ایس ایکٹ کی متعلقہ دفعات کے تحت نامزد ہے۔ تحقیقات سے یہ ثابت ہوا ہے کہ مذکورہ منسلک جائیداد منشیات کی اسمگلنگ سے حاصل کردہ غیر قانونی آمدنی سے خریدی گئی تھی۔ لہٰذا قانونی تقاضوں کے مطابق اسے ضبط کر لیا گیا ہے۔
غیر قانونی طور پر حاصل کی گئی جائیدادوں کو نشانہ بنا کر پولیس نہ صرف ملزمان کے خلاف کارروائی کر رہی ہے بلکہ منشیات نیٹ ورک کی معاشی بنیادوں کو بھی ختم کرنے کے لیے کوشاں ہے۔
پولیس نے اپنے اس عزم کا اعادہ کیا ہے کہ ضلع کو منشیات سے پاک بنانے کے لیے کارروائیاں جاری رہیں گی اور منشیات کی اسمگلنگ میں ملوث افراد کو سخت قانونی نتائج کا سامنا کرنا پڑے گا، جس میں غیر قانونی جائیدادوں کی ضبطی بھی شامل ہے۔
