مانیٹرنگ ڈیسک
عالمی میڈیا رپورٹس کے مطابق امریکی اور اسرائیلی فوجی کارروائیاں ایران کے خلاف پانچویں ہفتے میں داخل ہو چکی ہیں۔ایران کے حامی گروہوں نے یمن سے اسرائیل کی طرف پہلی مرتبہ ایک میزائل فائر کیا ، جسے اسرائیلی دفاعی نظام نے روکنے کا دعویٰ کیا ہے۔جنگ اب صرف ایران اور اسرائیل تک محدود نہیں رہی، بلکہ خطے کے دوسرے ممالک پر بھی اثرات پھیل رہے ہیں۔
تہران کی تاریخی یونیورسٹی پر بمباری، عالمی سطح پر شدید ردعمل
ایران کے دارالحکومت تہران سائنس اینڈ ٹیکنالوجی یونیورسٹی پر مبینہ بمباری نے عالمی برادری میں تشویش پیدا کی ہے۔97 سال پرانے اس تعلیمی ادارے پر حملے کے سبب تعلیمی سرگرمیاں شدید متاثر ہوئیں، اور اوورسیز کمیونٹی سمیت مختلف حلقوں نے گہرے دکھ و افسوس کا اظہار کیا۔بین الاقوامی ذرائع نے کہا کہ تعلیمی اداروں کو نشانہ بنانا ناقابل قبول ہے کیونکہ یہ ہمیشہ محفوظ زون تصور کیے جاتے ہیں، اور ایسے حملے تعلیم اور عالمی امن کے لیے سنگین خطرہ ہیں۔
یمنی حوثیوں کا پہلی بار اسرائیل پر میزائل حملہ
اسرائیلی فوج نے کہا ہے کہ یمن نے ہفتے کی صبح اسرائیل کی جانب ایک میزائل داغا۔یہ پہلا موقع ہے کہ ایران۔اسرائیل جنگ کے دوران یمن سے اسرائیل پر براہِ راست حملہ ہوا۔حوثیوں کے فوجی ترجمان بریگیڈیئر جنرل یحییٰ سریع نے ایران کی حمایت میں ممکنہ عسکری شمولیت کے متعدد امکانات کی نشاندہی کی ہے۔اس واقعے سے علاقائی تصادم کے خدشات بڑھ گئے ہیں، خصوصاً عرب جزیرہ نما اور بحیرہ احمر کے تجارتی راستوں پر ممکنہ خطرات کے پیشِ نظر۔
حزب اللّٰہ کا اسرائیلی طیارے پر زمین سے فضا میں مار کرنے والا میزائل فائر کرنے کا دعویٰ
لبنانی ملیشیا حزب اللہ نے دعویٰ کیا ہے کہ اس نے بیروت میں اسرائیلی جنگی طیارے پر زمین سے فضا میں مار کرنے والا میزائل استعمال کیا۔
عرب میڈیا کے مطابق یہ پہلی بار ہے کہ حزب اللہ نے ایسے میزائل کا استعمال کیا، اور پچھلے 24 گھنٹوں میں 80 سے زائد کارروائیاں انجام دی گئی ہیں۔
حوثیوں کی سخت وارننگ،براہِ راست کارروائی کا عندیہ
حوثی گروپ نے خبردار کیا کہ اگر امریکہ اور اسرائیل کی ایران کے خلاف جاری جنگ میں مزید ممالک یا نیٹو جیسا عسکری اتحاد شامل ہوئے، تو وہ براہِ راست فوجی مداخلت کریں گے۔
گروپ کے ترجمان نے کہا کہ “ان کی انگلیاں ٹریگر پر ہیں” اور کسی بھی نئے اتحاد کے صورت میں فوری کارروائی ہوگی، مگر کارروائی کی نوعیت واضح نہیں کی گئی۔
ابوظہبی میں میزائل کے ملبے کے گرنے سے پانچ انڈین شہری زخمی
متحدہ عرب امارات کے دارالحکومت ابوظہبی میں فضائی دفاع نے بیلسٹک میزائل کو ناکارہ بنایا، لیکن ملبہ گرنے سے پانچ ہندوستانی شہری زخمی ہوئے۔ملبہ گرنے سے دو مقامات پر آگ لگی، جسے فوری طور پر بجھایا گیا۔
سعودی ایئر بیس پر حملہ ، 12 امریکی فوجی زخمی
سعودی عرب کے فوجی اڈے پر میزائل اور ڈرون حملے کے نتیجے میں کم از کم 12 امریکی فوجی زخمی ہوئے، جن میں سے دو کی حالت تشویشناک ہے۔حملے میں کئی امریکی فضائی ایندھن بھرنے والے طیاروں کو بھی نقصان پہنچا۔
صدر ٹرمپ کا نیٹو پر تنقیدی موقف
امریکی صدر ڈونلڈ ٹرمپ نے ایک بار پھر نیٹو پر ناراضگی کا اظہار کیا، کہ اگر اتحادی امریکہ کی حمایت نہیں
کریں گے تو امریکہ بھی ان کے لیے خدمات انجام دینے کی پابند نہیں۔
انہوں نے کہا کہ امریکہ آبنائے ہرمز اور دیگر سٹریٹجک مقامات پر فوجی مدد بھجوانے سے انکار کرسکتا ہے، جس سے عالمی سیاسی کشیدگی میں اضافہ ہوا ہے۔
عالمی آئل مارکیٹ پر دباؤ برقرار ، قیمت 110 ڈالر فی بیرل
مشرق وسطیٰ میں جاری جنگ اور آبنائے ہرمز کے خطرات کے باعث برانٹ آئل کی قیمت 2.5% اضافے کے ساتھ
تقریباً 110 ڈالر فی بیرل ہوگئی۔
یہ عالمی معیشت پر دباؤ اور توانائی کی قیمتوں میں اضافے کی وجہ سے پیدا ہونے والی مشکلات کو مزید بڑھا رہا ہے۔
