سری نگر: سری نگر میں سرگرم ایک انتہائی منظم بین الاقوامی سائبر فراڈ نیٹ ورک کو کاؤنٹر انٹیلی جنس کشمیر(سی آئی کے) نے بے نقاب کرتے ہوئے سات ملزمان کو گرفتار کر لیا، جبکہ شہر میں مختلف مقامات پر چھاپوں کے دوران بڑی مقدار میں ڈیجیٹل آلات بھی ضبط کیے گئے۔
پولیس کے مطابق سی آئی کے۔سی آئی ڈی کو خفیہ اطلاعات ملی تھیں کہ کچھ خفیہ کال سینٹرز آن لائن دھوکہ دہی کی سرگرمیوں میں ملوث ہیں، جو مقامی افراد کے ساتھ ساتھ بیرونِ ملک شہریوں کو بھی نشانہ بنا رہے تھے۔
ان اطلاعات کی بنیاد پر ماہرین اور فیلڈ افسران پر مشتمل خصوصی ٹیمیں تشکیل دی گئیں، جنہوں نے نگرانی اور ڈیجیٹل شواہد جمع کیے۔ تحقیقات کے دوران رنگریتھ کے صنعتی علاقے میں ایک اہم آپریشنل مرکز کی نشاندہی کی گئی۔چھاپوں کے دوران سات ملزمان کو موقع پر ہی گرفتار کر لیا گیا۔ پولیس نے 13 موبائل فون، 9 لیپ ٹاپ، سم کارڈز، نیٹ ورکنگ ڈیوائسز اور ڈیجیٹل اسٹوریج میڈیا ضبط کیے۔
ابتدائی تحقیقات سے معلوم ہوا ہے کہ ملزمان ایک منظم سائبر کرائم نیٹ ورک کا حصہ تھے، جس کے روابط جموں و کشمیر سے باہر بھی پھیلے ہوئے تھے۔ پولیس کے مطابق یہ نیٹ ورک خاص طور پر امریکہ، برطانیہ اور کینیڈا کے شہریوں کو نشانہ بناتا تھا، اور بین الاقوامی کمیونیکیشن ماسکنگ ٹیکنالوجی، جعلی شناخت اور نفسیاتی ہتھکنڈوں کا استعمال کرتا تھا۔پولیس نے بتایا کہ متعلقہ دفعات کے تحت مقدمہ درج کیا جا رہا ہے، جن میں دھوکہ دہی، مجرمانہ سازش اور انفارمیشن ٹیکنالوجی ایکٹ شامل ہیں۔
مزید تحقیقات، ضبط شدہ آلات کی فارنزک جانچ اور آئندہ چھاپوں کا سلسلہ جاری ہے تاکہ پورے نیٹ ورک کا سراغ لگایا جا سکے اور مزید ملزمان و متاثرین کی شناخت ہو سکے۔
