سری نگر، : کشمیر اور چناب ویلی کے بعض علاقوں میں وقفے وقفے سے بارش اور برف باری کے باوجود منگل کے روز سری نگر۔جموں قومی شاہراہ پر ٹریفک کی آمد و رفت جاری رہی۔
ٹریفک حکام کے مطابق ہلکی موٹر گاڑیوں (ایل ایم ویز) کو شاہراہ پر دونوں اطراف سے چلنے کی اجازت دی گئی، جبکہ بھاری موٹر گاڑیاں (ایچ ایم ویز) ضابطہ کار کے تحت ادھم پور سے سری نگر کی سمت روانہ ہوئیں۔
حکام نے کہا کہ شاہراہ کے اطراف موسمی صورتحال مستحکم رہی۔ اگرچہ آسمان پر بادل چھائے رہے تاہم تازہ بارش یا برف باری کی کوئی اطلاع موصول نہیں ہوئی۔ سڑک کی حالت تسلی بخش رہی جس کے باعث گاڑیوں کی نقل و حرکت میں کوئی رکاوٹ پیش نہیں آئی۔
انہوں نے مزید کہا کہ ٹریفک کی مسلسل نگرانی کی جا رہی ہے تاکہ آمد و رفت بلا تعطل جاری رہے، جبکہ مسافروں کو سفر کے دوران سرکاری ٹریفک ایڈوائزری پر عمل کرنے کی ہدایت دی گئی ہے۔
واضح رہے کہ سری نگر۔جموں قومی شاہراہ کشمیر وادی کو ملک کے دیگر حصوں سے جوڑنے والی واحد ہمہ موسمی سڑک ہے، جو موسم سرما کے دوران اکثر موسمی خرابیوں کے باعث متاثر ہوتی رہتی ہے۔ (کے این ٹی)
