سری نگر،: کشمیر میں جمعرات کے روز دو الگ الگ واقعات پیش آئے، جن میں سری نگر میں پولیس کنٹرول روم (پی سی آر) میں تعینات ایک پولیس اہلکار کی مشتبہ طور پر دل کا دورہ پڑنے سے موت جبکہ جنوبی کشمیر کے ضلع اننت ناگ کے علاقے اچھہ بل میں ایک 34 سالہ نوجوان کی لاش برآمد کی گئی۔
حکام کے مطابق آئی آر چھٹی بٹالین سے وابستہ ایک پولیس اہلکار پی سی آر سری نگر میں اپنے کمرے میں بے ہوش حالت میں پایا گیا۔ انہیں فوری طور پر پی سی آر اسپتال منتقل کیا گیا، جہاں ڈاکٹروں نے انہیں مردہ قرار دیا۔ ابتدائی طور پر موت کی وجہ دل کا دورہ بتائی جا رہی ہے۔
متوفی کی شناخت محمد بری ولد بیرو گجر، ساکن ڈوڈہ کے طور پر کی گئی ہے۔ لاش کو قانونی کارروائی کے لیے پی سی آر مردہ خانے میں رکھا گیا ہے۔
دریں اثنا، ایک اور واقعے میں جنوبی کشمیر کے ضلع اننت ناگ کے علاقے اچھہ بل سے 34 سالہ نوجوان کی لاش برآمد ہوئی۔ متوفی کی شناخت مسرور احمد ولد حبیب اللہ موچی، ساکن شیلی پورہ اچبل کے طور پر کی گئی ہے۔
لاش کو راہگیروں نے دیکھا جس کے بعد پولیس کو اطلاع دی گئی۔ پولیس کی ٹیم موقع پر پہنچی اور لاش کو طبی و قانونی کارروائی کے لیے اسپتال منتقل کیا گیا۔ پولیس نے اس سلسلے میں مقدمہ درج کر کے تحقیقات شروع کر دی ہیں۔
کے این او ، جی این ایس
