دنیا بھر میں 2024 میں 14 خواتین صحافیوں سمیت 122 میڈیا اہلکاروں کو قتل کیا گیا

بروسلز:انٹرنیشنل فیڈریشن آف جرنلسٹس (آئی ایف جے) نے پیر کے روز صحافیوں اور میڈیا کے عملہ کے قتل پر اپنی 34 ویں سالانہ رپورٹ شائع کی، جس میں 2024 میں دنیا بھر میں 14 خواتین صحافیوں سمیت 122 میڈیا اہلکاروں کی ہلاکتوں کی تفصیل دی گئی ہے۔
فیڈریشن اقوام متحدہ کے رکن ممالک سے مطالبہ کرتی ہے کہ صحافیوں کے تحفظ اور آزادی سے متعلق آئی ایف جے کی زیر قیادت بین الاقوامی کنونشن کو فوری طور پر اپنایا جائے۔
آئی ایف جے کے صدر ڈومینک پراڈیلی نے کہا، "یہ سال صحافیوں کے لیے ریکارڈ سطح پر سب سے مہلک ترین سال رہا ہے، فلسطین مسلسل دوسرے سال سب سے خطرناک ملک قرار پایا ہے۔” ہماری بار بار کے مطالبات اور انتباہات کے باوجود اسرائیل فلسطین، لبنان اور شام میں صحافیوں کا قتل عام جاری رکھے ہوئے ہے۔ عالمی برادری کو صحافیوں کے خلاف اسرائیل کے جرائم پر سزا دیے بغیر دم نہيں لینا چاہیے۔
2024 میں مغربی ایشیا اور عرب دنیا میں بھی صحافیوں کی ہلاکتیں خوفناک تھیں، جن کی مجموعی تعداد 77 تک پہنچ گئی۔ ان میں سے زیادہ تر ہلاکتیں غزہ اور لبنان میں جنگ کی وجہ سے ہوئیں۔
اعداد و شمار کے مطابق، 2024 میں دنیا کے دیگر حصوں میں میڈیا کے بہت سے پیشہ ور افراد فوت ہوئے: 22 صحافی ایشیا پیسیفک، دس افریقہ میں، نو امریکہ میں اور چار یورپ میں قتل کیے گئے۔
آئی ایف جے نے اپنی رپورٹ میں مختلف شعبوں سے تعلق رکھنے والے پانچ صحافیوں کی کہانیاں پیش کی ہیں۔ ان کی موت دنیا بھر میں میڈیا کے پیشہ ور افراد کو درپیش خطرات کی عکاسی کرتی ہے۔ رپورٹ میں درج 122 کہانیوں میں سے صرف پانچ کو شامل کیا گیا ہے۔