شوکت ساحل
سونہ مرگ: وزیر اعظم نریندر مودی کے آج یعنی پیر کو اب سے تھوڑی دیر بعد سونہ مرگ میں زیڈ موڑ ٹنل کا اففتاح کریں گے۔
اس سلسلے میں ایک تقریب منعقد ہونے جا رہی ہے جس کے لئے تمام ضروری انتظامات کو حتمی شکل دے دی گئی ہے ۔وزیر اعظم سونہ مرگ میں اسٹریٹجک 6.4 کلومیٹر طویل زیڈ ٹنل کا افتتاح کریں گے۔
افتتاحی تقریب میں روڈ ٹرانسپورٹ اور ہائی ویز کے مرکزی وزیر نتن گڈکری، جموں و کشمیر کے لیفٹیننٹ گورنر منوج سنہا، وزیر اعلیٰ عمر عبداللہ کے علاوہ دیگر معززین بھی شرکت کریں گے۔
وزیر اعظم ٹنل کے افتتاح کے بعد ایک عوامی اجتماع سے بھی خطاب کریں گے اور ٹنل کی تعمیر کے کارکنوں اور انجینئروں سے ملاقات کریں گے جنہوں نے مشکل حالات میں کام کرکے انجینئرنگ کے اس کارنامے کو انجام دیا۔
یہ وزیر اعظم کا گذشتہ سال اکتوبر میں جموں و کشمیر میں منتخب حکومت کے اقتدار میں آنے کے بعد اور سال نو کا پہلا دورہ ہوگا۔حکام نے بتایا: ‘وزیر اعظم کے دورے کے پیش نظر تمام تر انتظامات کو حتمی شکل دی گئی ہے’۔
زڈ مورہ ٹنل سیاحت کے فروغ کے لئے معاون ثابت ہوگی: وزیر اعلیٰ عمر عبداللہ
وزیر اعلیٰ عمر عبداللہ کا کہنا ہے کہ لوگ 6.4 کلو میٹر طویل زڈ مورہ ٹنل کے افتتاح کے لیے بے صبری سے انتظار کر رہے ہیں اور یہ ٹنل سونہ مرگ میں سیاحت کے فروغ کے لیے معاون ثابت ہوگی۔
انہوں نے کہاکہ اب ہم لداخ کو جوڑنے والی زوجیلا ٹنل کے منتظر ہیں جس پر گزشتہ کئی سالوں سے کام چل رہا ہے۔ان باتوں کا اظہار وزیر اعلیٰ نے گزشتہ روز گلمرگ میں نامہ نگاروں سے بات چیت کے دوران کیا۔
انہوں نے کہاکہ وزیر اعظم نریندر مودی پیر کو سونہ مرگ میں زڈ مورہ ٹنل کا افتتاح کریں گے اور اس حوالے سے صوبائی انتظامیہ نے تمام تر تیاریاں مکمل کی ہیں۔
وزیرا علیٰ نے کہاکہ لوگ زڈ مورہ ٹنل کے افتتاح کا بے صبری کے ساتھ انتظار کر رہے تھے خاص طور پر سونہ مرگ اورا س کے ملحقہ علاقوں کے رہنے والے لوگ کیونکہ اس ٹنل کی تعمیر سے ان کا سفر آسان ہوگا۔ان کا مزید کہنا تھا کہ ہماری پوری کوشش رہے گی کہ موسم سرما کے دوران سونہ مرگ میں ونٹر کھیلوں کا انعقاد عمل میں لایا جائے تاکہ اس خطے میں سیاحتی شعبے کو مزید فروغ مل سکے۔
وزیراعظم کا دورہ کشمیر: سری نگر اور گاندربل میں سیکورٹی کے فقید المثال انتظامات
وزیراعظم نریندر مودی کے دورے کشمیر کے پیش نظر سیکورٹی کے غیر معمولی انتظامات کئے گئے ہیں۔ سری نگر اور گاندربل اضلاع میں سیکورٹی فورسز کی اضافی نفری تعینات کی گئی ہے اور کسی کو بھی بغیر تلاشی کے آگے جانے کی اجازت نہیں دی جارہی ہے۔سونہ مرگ میں زڈ مورہ ٹنل کی افتتاحی تقریب کے پیش نظر گاندربل اور سری نگر کے مضافاتی علاقوں میں سیکورٹی کے سخت ترین انتظامات کئے گئے ہیں۔
سری نگر کے حبک کراسنگ علاقے سے ہی سیکورٹی فورسز کی اضافی نفری کو تعینات کیا گیا ہے۔ گاڑیوں اور موٹر سائیکلوں کو تلاشی کے بغیر آگے جانے کی اجازت نہیں دی جارہی ہے۔ گاندربل میں سیکورٹی فورسز کو مستعد رہنے کے احکامات صادر کئے گئے ہیں جبکہ سی سی ٹی وی کیمروں کے ذریعے لوگوں پر نظر گزر رکھی جارہی ہیں۔
وزیر اعظم دفتر میں تعینات وزیر مملکت ڈاکٹر جتیندر سنگھ اتوار کو سری نگر پہنچے اور ہوائی اڈے پر بی جے پی کے سینئر لیڈروں نے ان کا استقبال کیا۔
افتتاحی تقریب میں مرکزی وزیر ٹرانسپورٹ نتن گڈکری، وزیر اعظم دفتر میں تعینات وزیر مملکت ڈاکٹر جتیندر سنگھ، ٹرانسپورٹ کے وزیر مملکت اجے تمتا ، لیفٹیننٹ گورنر منوج سنہا، وزیر اعلیٰ عمر عبداللہ ، نائب وزیر اعلیٰ سریندر کمار چودھری، اپوزیشن لیڈر سنیل شرما ، ممبر پارلیمان آغا روح اللہ مہدی کے علاوہ ممبر پارلیمنٹ غلام علی بھی موجود رہیں گے۔
ذرائع کا کہنا ہے کہ پولیس سربراہ نالین پربھات ، آئی جی کشمیر وی کے بردی کے علاوہ سراغ رساں ایجنسی اور وزارت داخلہ کے سینئر آفیسران گزشتہ چوبیس گھنٹوں سے سونہ مرگ میں خیمہ زن ہے۔باوثوق ذرائع کے مطابق سونہ مرگ کے اوپری پہاڑی علاقوں میں بھی سیکورٹی فورسز کی تعیناتی عمل میں لائی گئی ہے۔
