سری نگر اور بارہمولہ اضلاع میں خاتون سمیت 4 منشیات فروش گرفتار، ممنوعہ مواد بر آمد: پولیس

سری نگر: معاشرے سے منشیات کی بیخ کنی کو یقینی بنانے کے لئے جنگ کو جاری کو رکھتے ہوئے پولیس نے سری نگر اور بارہمولہ اضلاع میں الگ الگ کارروائیوں کے دوران ایک خاتون سمیت4منشیات فروشوں کو گرفتار کرکے ان کی تحویل سے ممنوعہ مواد بر آمد کیا ہے۔ایک پولیس ترجمان نے اپنے ایک بیان میں تفصیلات فراہم کرتے ہوئے کہا کہ پولیس اسٹیشن بونیار کی ایک پارٹی نے بیلہ کراسنگ بونیار میں ایک ناکے پر ایک مشکوک شخص کو روکا۔انہوں نے کہا کہ تلاشی کے دوران اس کی تحویل سے 50 گرام چرس جیسا مواد بر آمد کیا گیا جس کے بعد اس کو بر سر موقع گرفتار کیا گیا۔
بیان میں گرفتار شدہ کی شناخت رفیق احمد شیخ ولد طارق احمد شیخ ساکن ہوندی نوشہرہ کے طور پر کی گئی ہے۔
موصوف ترجمان نے بتایا کہ تفتیش کے دوران ملزم نے انکشاف کیا کہ اس نے یہ مواد شمیمہ بیگم زوجہ محمد مقبول شیخ ساکن لاری کاسی بونیار نامی خاتون سے خریدا تھا۔
انہوں نے کہا کہ اس لیڈ پر کارروائی کرتے ہوئے ایک پولیس ٹیم نے متعلقہ مجسٹریٹ کی موجودگی میں مذکورہ خاتون کی رہائش گاہ کی تلاشی لی۔ان کا کہنا ہے کہ اس تلاشی آپریشن کے نتیجے میں 62 گرام چرس جیسا ممنوعہ مواد اور 1 کلو گرام چرس کا پاؤڈر برآمد کر لیا گیا۔بیان میں کہا گیا کہ ملزم خاتون کو فوری طور پر گرفتار کر لیا گیا اور اس غیر قانونی سرگرمی کے وسیع تر گٹھ جوڑ کو بے نقاب کرنے کے لیے مزید تفتیش جاری ہے۔
دریں اثنا اس ضمن میں پولیس اسٹیشن بونیار میں متعلقہ دفعات کے تحت ایک کیس درج کرکے مزید تحقیقات شروع کی گئی ہیں۔
اسی طرح کی کارروائیوں کے دوران پولیس نے سری نگر میں 2 منشیات فروشوں کو گرفتار کرکے ان کی تحویل سے نشہ آور مواد بر آمد کیا۔
ایک پولیس ترجمان نے اپنے ایک بیان میں کہا کہ پولیس اسٹیشن شالہ ٹینگ کی ایک ٹیم نے لاوے پورہ / مجھہ گنڈ ایکسز پر ایک ناکے کے دوران ایک مشکوک شخص کو روکا جس نے پولیس کو دیکھ کر فرار ہونے کی کوشش کی۔
انہوں نے کہا کہ تلاشی کے دوران اس کی تحویل سے قریب 22 گرام ہیرائن جیسا مواد بر آمد کیا گیا جس کے بعد اس کو گرفتار کیا گیا۔
انہوں نے گرفتار شدہ کی شناخت محمد یاسین بٹ عرف شاکا ولد غلام احمد بٹ ساکن آستان محلہ گنڈ حسی بٹ سری نگر کے طور پر کی ہے۔
پولیس ترجمان نے بتایا کہ علاوہ ازیں پولیس اسٹیشن جڈی بل کی ایک ٹیم نے سازگری پورہ میں ایک ناکے پر ایک مشکوک شخص کو روکا۔
انہوں نے کہا کہ تلاشی کے دوران اس کی تحویل سے 4 گرام ہیرائن اور 3 ہزار 20 روپیے نقدی بر آمد کئے گئے۔
گرفتار شدہ کی شناخت وسیم احمد بفندہ ولد غلام احمد ساکن ملہ باغ حضرت بل کے طور پر ہوئی ہے۔
انہوں نے کہا کہ دونوں ملزموں کو گرفتار کیا گیا اور متعلقہ تھانوں میں ان کے خلاف این ڈی پی ایس ایکٹ کے تحت مقدمے درج کئے گئے۔