نیوزڈیسک
بھدرواہ جموں :صوبہ جموں کے ڈوڈہ ضلع کے بھدرواہ علاقے میں اُس وقت سراسیمگی پھیل گئی جب یہاں ایک گیسٹ ہاﺅس سے تین نوجوانوں کو مردہ حالت میں پایا گیا ۔اس سلسلے میں ایس ایس پی ڈوڈہ سندیپ مہتا نے تفصیلات فراہم کرتے ہوئے کہا کہ ایک پولیس افسر کو جموں سے فون آیا کہ اس کا بھائی اپنے دوستوں کے ساتھ نیا سال منانے کے لیے بھدرواہ میں ہے، لیکن وہ کال کا جواب نہیں دے رہے ہیں۔
سندیپ مہتا نے اس ضمن میں مزید جانکاری دیتے ہوئے کہا کہ، پولیس نے معلومات کی بنیاد پر تلاشی مہم شروع کر دی ہے اور ان کی گاڑی ایک گیسٹ ہاو¿س ’رائل ان‘ کے باہر سے ملی۔ ہمیں معلوم ہوا ہے کہ وہ گیسٹ ہاو¿س میں مقیم تھے لیکن ان کا کمرہ بند تھا۔ ہم دروازہ کھولنے میں کامیاب ہوئے اور انہیں بے ہوش پایا۔ جس کے بعد ڈاکٹروں کو بلایا گیا ،طبی معائینہ کے بعد ڈاکٹروں نے تینوں کو مردہ قرار دے دیا۔
مہتا نے بتایا کہ ابتدائی تحقیقات میں ایسا لگتا ہے کہ دم گھٹنے کی وجہ سے ان کی موت ہوئی ہے۔ ایس ایس پی نے مزید کہا کہ، کمرے کے اندر کوئلے کا چولہا تھا۔ کمرے میں زیادہ وینٹیلیشن نہیں، جو موت کی وجہ ہو سکتی ہے۔ ایس ایس پی کے مطابق ایک شخص واش روم کے اندر پایا گیا اور دو بستر پر پڑے ہوئے تھے۔
انہوں نے بتایا کہ ان کی شناخت مکیش کمار، آشوتوش اور سنی چودھری کے طور پر ہوئی ہے جو جموں کے ڈومانہ اور پورکھو علاقوں کے رہنے والے ہیں۔پولیس کے مطابق اس معاملے میں مزید تفتیش جاری ہے۔(نیوز ایجنسیز )
