روپ وے پروجیکٹ معاملہ: کٹرا میں دوسرے دن بھی مکمل بند

جموں:جموں وکشمیر کے ضلع ریاسی کے قصبہ کٹرا میں روپ وے پروجیکٹ کے خلاف شری ماتا ویشنو دیوی سنگھرش سمیتی کی طرف سے دی گئی 72 گھنٹے کی بند کال جمعرات کو دوسرے دن میں داخل ہوگئی۔
تمام اسٹیک ہولڈرز بشمول ٹٹو مالکان، دکاندار اور دیگر تاجر کٹرا میں مجوزہ روپ وے پروجیکٹ کے خلاف احتجاج کر رہے ہیں۔
اس دوران کٹرا میں جمعرات کو لگاتار دوسر دن بھی تمام کاروباری سرگرمیاں معطل رہیں اور دکان بند رہے جس سے لوگوں کو گونا گوں مشکلات کا سامنا کرنا پڑا۔
اطلاعات کے مطابق پولیس نے بدھ کے روز کچھ احتجاجیوں کو حراست میں لیا تھا۔
احتجاجیوں کا الزام ہے کہ بجائے اس کے کہ بات چیت کرکے اس معامل کا حل نکالا جائے، حکومت اس مسئلے کو پٹری سے اتار رہی ہے جس کی وجہ سے وہ سڑکوں پر آنے کے لئے مجبور ہو رہے ہیں۔
شری ماتا ویشنو دیوی شرائن بورڈ نے گزشتہ ماہ، بزرگ شہریوں، بچوں اور دیگر لوگوں کے لیے مندر تک رسائی کی سہولت فراہم کرنے کے لیے روپ وے نصب کرنے کے منصوبوں کا اعلان کیا تھا۔
250 کروڑ روپے کے مجوزہ منصوبے کا مقصد تاراکوٹ مرگ کو سنجی چھت سے جوڑنا ہے، جو مندر کی طرف جاتا ہے۔
دریں اثنا کٹرا کے نوجوانوں نے شری ماتا ویشنو دیوی سنگھرش سمیتی کے 18 ارکان کی حراست میں لینے کے خلاف بھوک ہڑتال شروع کر دی ہے۔ جنہیں کل شام حراست میں لیا گیا تھا۔
ان کا کہنا ہے کہ جب تک ان اراکین کو رہا نہیں کیا جائے گا تب تک وہ بھوک ہڑتال جاری رکھیں گے۔