استنبول: پرچم بردار کمپنی ترکی ایئر لائنز نے شہر استنبول اور لبنان کے دارالحکومت بیروت کے درمیان پروازیں دوبارہ شروع کر دی ہیں۔اسپوتنک نے بدھ کے روز ترکی ایئر لائنز کے حوالے سے بتایا کہ اس ایئر لائن کمپنی نے ستمبر کے آخر میں عرب ملک اور اسرائیل کے درمیان مسلح تنازعہ بڑھنے کے بعد ترکی اور لبنان کے درمیان پروازیں معطل کر دی تھیں۔
کمپنی نے کہا ’’استنبول سے بیروت کے لیے پہلی پروازیں منگل کو دوبارہ چلائی گئیں اور دونوں شہروں کے درمیان دو پروازیں اب جمعہ سے بکنگ کے لیے دستیاب ہیں۔‘‘واضح رہے کہ گذشتہ ہفتے اسرائیل کی سیکورٹی کابینہ نے لبنان کی حزب اللہ کے ساتھ امریکی ثالثی میں جنگ بندی کو منظوری دی تھی۔
اسرائیلی وزیر اعظم بنجامن نتن یاہو نے بتایا کہ مبینہ ایرانی خطرے پر توجہ مرکوز کرنے اور غزہ پٹی میں حماس کو تنہا کرنے کے لیے جنگ بندی کی ضرورت تھی۔ انہوں نے کہا کہ اگر حزب اللہ نے معاہدے کی خلاف ورزی کی تو اسرائیل دوبارہ دشمنی شروع کر دے گا۔
لبنانی پارلیمنٹ کے اسپیکر نبی بیری نے جنگ بندی کی نگرانی کرنے والی کمیٹی پر زور دیا کہ وہ اسرائیل کو فوری طور پر تمام خلاف ورزیاں بند کرنے اور لبنانی سرزمین سے فوجیں ہٹانے کی ہدایت کرے۔ اسپیکر نے اسرائیلی فوج پر 27 نومبر کو جنگ بندی کے نفاذ کے بعد سے 54 بار اس کی خلاف ورزی کرنے کا الزام لگایا۔
یو این آئی
