جموں: جموں کے اکھنور علاقے میں لائن آف کنٹرول (ایل او سی) کے نزدیک پیر کی صبح مشتبہ ملی ٹنٹوں نے ایک فوجی ایمبولینس پر فائرنگ کی جس کے بعد سیکورٹی فورسز نے علاقے کو محاصرے میں لے کر تلاشی آپریشن شروع کر دیا ہے۔
سرکاری ذرائع نے بتایا کہ جموں کے اکھنور کے جوگون پٹن علاقے میں پیر کی صبح قریب چھ بجے مشتبہ ملی ٹنٹوں نے ایک فوجی ایمبو لنس پر فائرنگ کی۔
انہوں نے کہا کہ فوجی جوانوں نے پوزیشن سنبھال کر اس کا جواب دیا۔
ان کا کہنا تھا کہ واقعے کے بعد سیکورٹی فورسز نے پورے علاقے کو محاصرے میں لے کر تلاشی آپریشن شروع کر دیا ہے۔
فوج کی وائٹ نائٹ کور نے ’ایکس‘ پر اپنے ایک پوسٹ میں کہا: ’سندر بنی سیکٹر کے اسن علاقے کے نزدیک آج صبح دہشت گردوں نے فوجی گاڑیوں پر فائرنگ کی‘۔
انہوں نے کہا: ’جوانوں کی فوری جوابی کارروائی اس کوشش کو ناکام بنا کر کوئی جانی نقصان نہ ہونے کو یقینی بنایا‘۔
ان کا کہنا ہے کہ علاقے میں تلاشی آپریشن جاری ہے۔
ذرائع کا کہنا ہے کہ طرفین کے درمیان رک رک کر گولیوں کا تبادلہ جاری ہے۔
بتایا جاتا ہے کہ محاصرے میں دو سے تین ملی ٹنٹ پھنسے ہوئے ہیں۔
یو این آئی
