یو این آئی
سرینگر/شمالی ضلع بارہ مولہ کے بوٹہ پتھری علاقے میں ملی ٹینٹوں نے فوجی گاڑی پر گھات لگا کر حملہ کیا جس کے نتیجے میں دو مقامی پورٹر اور دو فوجیوں سمیت چارافراد جاں بحق جبکہ تین دیگر زخمی ہوئے ہیں۔ ادھرجموں وکشمیر کے وزیر اعلیٰ عمر عبداللہ نے بوٹہ پتھری گلمرگ میں فوجی گاڑی پر ہوئے حملے کی سخت الفاظ میں مذمت کی۔اطلاعات کے مطابق جمعرات شام دیر گئے گلمرگ میں ایل او سی کے نزدیک بوٹہ پتھری علاقے میں تاک میں بیٹھے ملی ٹینٹوں نے فوج کی ایک گاڑی پر گھات لگا کرحملہ کیا جس کے نتیجے میں گاڑی میں سوار پانچ اہلکار اور دو پورٹر شدید طورپر زخمی ہوئے۔معلوم ہوا ہے کہ زخمیوں کو علاج ومعالجہ کی خاطر نزدیکی ہسپتال منتقل کیا گیا تاہم ڈاکٹروں نے دو فوجی اہلکار اور دو پورٹروں کو مردہ قرار دیا۔ذرائع نے بتایا کہ حملے میں زخمی ہوئے تین فوجی جوانوں کی بھی حالت تشویشناک بنی ہوئی ہے۔باوثوق ذرائع کے مطابق سیکورٹی فورسز نے جائے وقوع کے اردگرد علاقوں کو محاصرے میں لے کر حملہ آوروں کی بڑے پیمانے پر تلاش شروع کی ہے۔پولیس کے ایک ترجمان نے بتایا کہ بارہ مولہ کے بوٹہ پتھری علاقے میں سیکورٹی فورسز اور ملی ٹینٹوں کے مابین گولیوں کا تبادلہہوا ، اور اس حوالے سے مزید تفصیلات کا انتظار ہے۔سری نگر نشین دفاعی ترجمان نے بھی حملے کی تصدیق تو کی تاہم جانی نقصان کے بارے میں کچھ بھی کہنے سے انکار کیا۔علاوہ ازیں گلمرگ میں ایل او سی کے نزدیک ہوئے حملے کے بعد سرحدی علاقوں میں سیکورٹی فورسز کو ہائی الرٹ پر رہنے کے احکامات صادر کئے گئے ہیں۔گگن گیر حملے کے بعد آج صبح ترال میں بھی ایک غیر مقامی مزدور پر ملی ٹینٹوں نے حملہ کیا اور شام دیر گئے گلمرگ میں فوجی کانوائی پر حملے کے بعد وادی کشمیر میں سیکورٹی صورتحال کا از سر نو جائز ہ لیا جارہا ہے۔ادھرجموں وکشمیر کے وزیر اعلیٰ عمر عبداللہ نے بوٹہ پتھری گلمرگ میں فوجی گاڑی پر ہوئے حملے کی سخت الفاظ میں مذمت کی۔انہوں نے کہاکہ انتہائی افسوسناک خبر آرہی ہے کہ گلمرگ کے بوٹہ پتھری علاقے میں فوجی گاڑی پر حملہ ہوا جس کے نتیجے میں کچھ افراد جاں بحق اور کئی ایک زخمی ہوئے ہیں۔وزیر اعلیٰ نے نے کہا :’کشمیر میں حالیہ حملوں کا یہ سلسلہ انتہائی تشویشناک ہے، میں اس حملے کی سخت ترین الفاظ میں مذمت اور جاں بحق ہوئے فوجیوں کے اہل خانہ سے تعزیت کا اظہار کرتا ہوں۔ ‘وزیر اعلیٰ نے حملے میں زخمی ہوئے فوجیوں کی جلد صحت کے لئے دعا کی۔‘
