کولگام:جنوبی ضلع کولگام کے آدیگام دیوسر گاوں میں سیکورٹی فورسز اور ملی ٹینٹوں کے مابین گولیوں کا تبادلہ جاری ہے۔ذرائع نے بتایا کہ سیکورٹی فورسز کو ایک خاص اطلاع موصول ہوئی کہ کولگام کے آدیگام دیوسر گاوں میں ملی ٹینٹ چھپے بیٹھے ہیں۔انہوں نے کہاکہ درمیانی شب سیکورٹی فورسز نے گاوں کو محاصرے میں لے کر ملی ٹینٹ مخالف آپریشن شروع کیا۔
ذرائع کے مطابق ہفتے کی صبح جوں ہی سلامتی عملے کے اہلکار مشتبہ مقام کے نزدیک پہنچے تو وہاں پر چھپے بیٹھے ملی ٹینٹوں نے فورسز پر اندھا دھند فائرنگ شروع کردی چنانچہ سلامتی عملے نے بھی پوزیشن سنبھال کر جوابی کارروائی کا آغاز کیا جس دوران شدید گولیوں کا تبادلہ شروع ہوا۔
معلوم ہوا ہے کہ سیکورٹی فورسز نے آدیگام دیوسر اور اس کے ملحقہ علاقوں کو محاصرے میں لے کر فرار ہونے کے سبھی راستوں پر پہرے بٹھا دئے ہیں۔ذرائع نے مزید بتایا کہ سیکورٹی فورسز نے لوگوں کے چلنے پھرنے پر بھی پابندی عائد کردی ۔آخری اطلاعات موصول ہونے تک علاقے میں دو بدو گولیوں کا تبادلہ جاری تھا۔دریں اثنا پولیس ترجمان نے ایکس پر جانکاری فراہم کرتے ہوئے بتایا :’کولگام کے آدیگام دیوسر علاقے میں انکاونٹرجاری ہے اور اس سلسلے میں مزید تفصیلات کا انتظارہے ۔‘
یو این آئی
